Pikëpyetja/ Shaqiri nuk shkon në Serbi, vendimin e mori federata zvicerane

Një ngjarje që mund të bëjë bujë nëse federata e ka ndaluar të udhëtojë në Serbi për shkak të përplasjeve, por zyrtarisht u dha se është i dëmtuar. Kështu, Xherdan Shaqiri nuk udhëton për në Novi-Sad të Serbisë për ndeshjen e Zvicrës ndaj Bjellorusisë. Kjo është bërë e ditur të dielën nga Federata e Futbollit të Zvicrës. Shaqiri është i lënduar dhe ka lëshuar ndeshjen e fundit të skuadrës amerikane, Çikago Fire. Mungesa e Shaqirit është goditje ndaj Zvicrës për ndeshjet e para kualifikuese për “Euro 2024”. Ai është lojtari kryesor ofensiv i Zvicrës. Zvicra më 25 mars luan ndaj Bjellorusisë në Novi-Sad të Serbisë. Ndërsa më 28 mars e pret Izraelin në Gjenevë. Në përfaqësuesen helvetike tani janë dy shqiptarë, Granit Xhaka dhe Andi Zeqiri. “Trajneri i ekipit nacional, Murat Jakin, do të jetë pa shërbimet e Xherdan Shaqirit dhe Gregor Kobelit për ndeshjet kualifikuese ndaj Bjellorusisë dhe Izraelit. Ata mungojnë për shkak të lëndimeve. Xherdan Shaqiri nuk do t’i bashkohet ekipit nacional për shkak të një problemi muskulor. Asnjë lojtar nuk është ftuar në vend të tij. Gregor Kobel do të zëvendësohet nga Jeremi Frik i Servetes”, ka njoftuar Federata e Futbollit e Zvicrës të dielën. Përfaqësuesja zvicerane, të hënën, grumbullohet për ndeshjet me Bjellorusinë dhe Izraelin. Shaqiri ka dërguar dy herë Serbinë në shtëpi nga kampionatet botërore, në “Rusia 2018” dhe “Katari 2022”. Dhe po ashtu është ofenduar nga huliganët serbë. Është pritur me vëmendje paraqitja e tij në territorin e Serbisë ndaj Bjellorusisë. Por problemet fizike ia pamundësojnë atij paraqitjen në Serbi. Shaqiri 31-vjeçar, për Zvicrën ka luajtur plot 112 ndeshje, ndërsa i ka shënuar 27 gola. Ai ka luajtur për disa prej skuadrave më të mëdha evropiane si Bajerni, Interi e Liverpuli, e tani me Çikago Fajr në SHBA.