Qëndrimi i Elez Gjozajt për Kovaçin synon një zgjidhje “tek për tek”

Debatet e trajnerit Zef Kovaçi me presidentin e Federatës Shqiptare të Peshëngritjes Elez Gjoza janë fokusuar në aspekte morale dhe ligjore. Tekniku dëshiron dhënien e shpërblimit sipas ligjit, kurse kreu i federatës Gjoza i ka ofruar zgjidhje nëpërmjet një bisedimi kokë më kokë, duke nënkuptuar një ceremoni largimi me vlerësim për trajnerin e në të njëjtën kohë dhënien e një shume financiare nga xhepi i tij për Kovaçin që çështja të mos agravohet e të prishet më tej imazhi i shtangës. Por së fundmi Gjoza shpjegon se nuk është çështje e institucionit që ai drejton, por mes sportistit e trajnerit. Në rrëfimin që ai bën për TVSH-në, Gjoza insiston që zgjidhja të vijë nga një takim i tij me trajnerin Kovaçi, një lloj takimi “tek për tek”, që mund t’i ekuilibrojë palët në qëndrimet e tyre dhe t’i çojë në një zgjidhje të pranueshme. “Unë si president i kam shkruajtur rregullisht. Kam bërë dhe një prononcim në gazetën “SOT”, ku jam i drejtuar trajnerit Zef Kovaçi "Hajde më tako! E ke zgjidhjen në moment nga presidenti për atë që e quan se është bërë e padrejtë". Dhe unë kam një ide tjetër. Profesor Zefi nuk mund të largohej kështu nga një jetë 40-vjeçare si teknik pasi unë si president dhe Federata për këto njerëz duhet të ketë shumë vlerësim. Dhe unë mendova dhe e them përsëri mendoj ta realizoj, sepse nuk dua që Zefi të iki i pezmatuar, apo i fyer për asnjë arsye, por duhet bërë një ceremoni ashtu sikurse i takon atij”, thotë Gjoza. Në një intervistë që ai ka dhënë javë më parë për gazetën “SOT”, i mëshonte faktit se zgjedhja e trajnerit është ekskluzivitet i sportistit dhe sipas tij Erkand Qerimaj është sportist elitar dhe e ka këtë të drejtë. Por a është tamam kështu? Hyrja e prokurorisë në lojë është një hap tjetër në këto raporte që tregon se mes palëve ka lindur një “armiqësi” jo e vogël.