Qëndrimi i John Obi Mikel: Lukaku s’është për Premier League, duhet të kthehet me urgjencë në Serie A italiane

Sulmuesi zhgënjeu me Çelsin sezonin ë lamë pas dhe ish-futbollisti i “Bluve” e këshillon të kthehet në kampionatin italian

Merkato e Interit mund të jetë e kushtëzuar nga disa lëvizje të domosdoshme, por edhe për të rritur pritshmëritë e skuadrës në Champions League. Futbolli italian ka rënë disi në raport me futbollin anglez dhe atë spanjoll, gjë që shihet me mungesën e ekipeve italiane në fazën çerekfinale, gjysmëfinale e aq më pak në finale të Champions League. Në nivelin parësor të futbollit italianët mungojnë këto vite dhe pavarësisht përpjekjeve të federatës italiane për të lënë pas krizën dhe hapur një portë të re zhvillimi të futbollit në këtë vend, ka probleme serioze që duket më së pari të jenë të tipit financiar. Megjithatë, disa klube tentojnë të marrin më të mirët në treg duke bërë sakrificë në merkato. Interi është ekipi nënkampion që dëshiron të lerë gjurmë në sezonin e ri, jo vetëm për të fituar titullin në Serie A, por edhe të avancojë në Champions dhe për këtë duhet të bëjë lëvizje cilësore. Një nga emrat e lakuar është Romelu Lukaku, për të cilin po punohet të kthehet në Itali. 13 gola në 38 ndeshje përgjatë këtij sezoni te Çelsi janë shumë pak për një sulmues për të cilin në verë londinezët shpenzuan 100 milionë euro për ta transferuar në “Stamford Bridge”. Fjala është për Romelu Lukakun i cili tashmë ëndërron një rikthim te Inter aty ku shfaqi më së miri kualitetet e tij. Por kush është arsyeja që belgu nuk mundi të tregohej vendimtar në Angli? Përgjigjen mundohet ta japë një ish i Çelsit. John Obi Mikel thekson se niveli në Premier League është shumë i lartë, në dallim nga Italia ku loja është e ngadaltë. Ndaj ish-mesfushori thekson se Lukaku duhet të kthehet shpejt në Serie A, pasi në Angli është inferior në duelet me kundërshtarët. “Mendoj se arsyeja pse Lukaku nuk shkëlqen në Angli ashtu siç bënte në Itali, qëndron te diferenca që kanë dy kampionatet. Premier League është shumë e fortë, e shpejtë, potente ndërsa në Serie A luhet një lojë e ngadaltë. Kampionati anglez ka shumë cilësi, ritmi i kampionatit është shumë i lartë dhe është dukshëm superior ndaj kampionatit italian. Në Itali lojtarët mund të luajnë deri në moshën 40-vjeçare, ndërsa në Premier është shumë e vështirë që diçka e tillë të ndodhë. Për mendimin tim, Lukaku duhet të kthehet shpejt në Itali për t’u rikthyer protagonist”, u shpreh Mikel. Duhet thënë se zhgënjimi i Lukakut tek Çelsi ka qenë mjaft i madh, prandaj Interi kërkon ta shfrytëzojë këtë moment në interesin e tij për ta kthyer belgun në klubin zikaltër.