Rikthehet me shkëlqim treshja Mesi-Nejmar-Mbape, PSG “fluturon” në miqësoren japoneze

Paris San Zhermen ka prej vitesh që mbledh lojtarët më të mirë në qarkullim, por ajo ende nuk e ka fituar një titull të Ligës së Kampioneve të Europës, pavarësisht dominimit të futbollit francez. Sheikët me në krye Al Khelaifin vijojnë të bëjnë blerje faranike, me lojtarët më të mirë në qarkullim, por Champions mungon. E megjithatë ai vijon të shpresojë. Ky edicion nisi me një miqësore në Japoni, dhe ka shkëndija për një shkëlqim të “yjeve” të skuadrës. Në fakt, “yjet” e Paris San Zhermen u argëtuan mjaftueshëm në testin miqësor ndaj skuadrës japoneze të Gamba Osaka. Para spektatorëve vendas, Lionel Mesi, Nejmar dhe Kilian Mbape nisën shfaqjen dhe bënë të mundur që PSG të arrinte një sukses me shifrat 2-6. Gjithsesi, serinë e golave e hapi Sarabia në minutën e 28-të që nuk e pati të vështirë të shënonte me portën e boshatisur. Katër minuta më pas ishte radha e Nejmar për të mposhtur portierin kundërshtar nga pika e bardhë e penalltisë. Në fakt, vendasit shkurtuan diferencën, por kjo vetëm sa shtoi oreksin e francezëve që trefishuan me anë të Nuno Mendez. Më pas ishte radha e dialogut Mesi-Nejmar me brazilianin që fillimisht asistoi për argjentinasin, ndërsa më pas ky i fundit i riktheu reston 30-vjeçarit. Nga ana tjetër, Osaka gjeti sërish rrjetën e Donarumës me anë të Jamamit, por në fund, kishte vend edhe për festën e Mbape të cilin Galtier e aktivizoi vetëm në minutën e 61-të. Sulmuesi fitoi një penallti të cilën e ekzekutoi saktësisht duke fiksuar shifrat 2-6. Befasues është qëndrimi i trajnerit të Barcelonës, Ksavi Hernandez, i cili po insiston që Leo Mesi të kthehet tek Barcelona. Një gjë të tillë e kishte kërkuar më parë edhe Juan Laorta, presidenti i klubit, i cili e kishte lënë derën të hapur që argjentinasi të kthehet dhe madje ai e cilësonte aventurën e Mesit tek Barça të papërfunduar. Trajneri i Barcelonës, Ksavi Hernardez, ka kërkuar nga presidenti i klubit Huan Laporta ta transferojë Lionel Mesin. Vetë Laporta ka uruar që kapitulli i Mesit në Barcelonë të mos ketë përfunduar. Ai shpreson që Mesi ta mbyllë karrierën te Barcelona. “Besoj, shpresoj dhe uroj që kapitulli i Mesit në Barcelonë të mos ketë mbaruar ende”, ka thënë presidenti i Barcelonës, raporton gazeta spanjolle “Sport”. Mesi me PSG-në ka kontratë deri në verën e vitit të ardhshëm. Ai u largua nga Barcelona si lojtar i lirë në vitin 2021. Te klubi francez nuk ka përmbushur pritshmëritë. Sulmuesi 35-vjeçar në Ligue 1 të Francës shënoi gjashtë gola dhe kontribuoi me 15 asistime në 26 paraqitje.