Sheiku Al Khelaifi: Mbape e do me zemër klubin e PSG, do të mbetet gjatë këtu

A do të qëndrojë Kilian Mbape te Paris San Zhermen apo do të fluturojë, siç duket, drejt Madridit, për t’iu bashkuar Realit, në fund të këtij sezoni? Presidenti i klubit parizien, Naser Al Khelaifi, u fokusua tek “ylli” francez në një intervistë për median polake: “Kilian Mbape është një lojtar i PSG-së. Ai e do këtë klub. Është një lojtar fantastik, më i miri në botë. Ne jemi të lumtur që e kemi dhe do ta kemi ta kemi më gjatë”. Numri një i PSG-së iu përgjigj gjithashtu një pyetjeje për mbi interesimin e mundshëm për Robert Levandovskin, përpara se ky i fundit të kalonte te Barcelona: “Politika ime është të mos flas për lojtarë që nuk janë te PSG dhe për transferime që do të ndodhin ose duhet të kishin ndodhur. Por nuk është sekret që Roberti është një sulmues fenomenal. Çdo klub i madh në botë e ka ditur dhe në një moment ka menduar për blerjen e tij. Por Levandovski është në Barcelonë sot dhe unë e respektoj këtë. Ju, polakët, duhet të jeni krenarë që ai është një makinë goli dhe një djalë i mire. Jemi takuar dhe unë mund të flas vetëm mirë për të”, tha ai. Ndërkohë, Reali i Madridit pretendons e herët a vonë do ta bindë sulmuesin e PSG-së që të veshë fanellën e “los Blancos”. Në të vërtetë Reali i Madridit e monitoron situatën e sulmuesit në vazhdimësi dhe ka bindjen se brenda vitit të ardhshëm do ta sjellë në kryeqytetin spanjoll. Por nuk është vetëm Kilian Mbape për sulmin e ri të Realit të Madridit. Merkato e verës së ardhshme pritet të jetë e zjarrtë në kryeqytetin spanjoll. Tekniku Karlo Ançeloti do të largohet e do të marrë Brazilin. Ndaj presidenti Florentino Perez ka dy preferenca për pasuesin e tij: Ksabi Alonso dhe Roberto De Zerbi. Ndërkohë, shtypi iberik shkruan se kreu i Realit, përveç firmës me Mbape, do të tentojë edhe blerjen e Son Heung-Min. 31-vjeçari korean është pjesë e Totenhemit prej vitit 2015. Këtë sezon është zgjedhur kapiteni i skuadrës pas largimit të Herri Kejn drejt Bajernit të Mynihut. Son, i cili ka kontratë deri në 2025 me Spurs, ka shënuar 5 gola deri tani në Premier League, duke ndihmuar skuadrën të bëjë mirë dhe të sigurojë rezultate pozitive. Te Reali nuk e kanë fshehur kurrë simpatinë për të. Dhe në verë pritet që Perez të nisë ofensivën finale për t’i dhuruar trajnerit të ri një futbollist fantastik. Vetë Son shpreson që të luajë një ditë me skuadrën më të titulluar në Europë. Ai dëshiron të fitojë trofe dhe Reali është mundësia më e mirë për ta bërë. Por marrëveshja s’do të jetë e lehtë.