Shorti i Europianit U-21, Shqipëria në grupin E me 6 rivalë shumë të fortë

Trajneri Alban Bushi ka të drejtë të trembet pasi mësoi dje shortin e Europianit për moshën deri në 21-vjeç, pasi goglat i dhuruan në grup rivalë shumë të fortë. Kuptohet, secila skuadër do të luajë shanset e veta, përfshi Shqipërinë, por pas këtij shorti kuqezinjtë e rinj nuk duket të jenë favoritë në grup. kështu, shorti i hedhur sot në selinë e UEFA-s në Nion të Zvicrës ka përcaktuar edhe 9 grupet përbërëse të kualifikueseve të Kampionatit Europian 2025 për këtë grup-moshë. Shqipëria U-21 është shortuar në Grupin E së bashku me Rumaninë, Zvicrën, Finlandën, Malin e Zi dhe Armeninë. Sipas kalendarit të UEFA-s, ndeshjen e fazës kualifikuese të Europianit U-21 do të nisin në datën 20 mars 2023 dhe do të përmbyllen më 15 tetor të 2024-s. Kujtojmë që dy kokat e grupit janë Rumania dhe Zvicra, dy skuadra që do të jenë të impenjuara edhe në finalet e Europianit 2023 në muajt qershor-korrik. Për të përcaktuar datat, oraret dhe vendet ku do të luhen ndeshjet e grupit, përfaqësuesit e FSHF-së do të diskutojnë me homologët e tyre të Grupit E për të vendosur kalendarin përfundimtar. Duke parë përbërjen e grupit, Shqipëria U-21 e trajnerit Alban Bushi do të synojë të kualifikohet në fazën finale të turneut, që do të luhet në vitin 2025 në Sllovaki. Në eliminatore marrin pjesë 53 vende të ndara në 7 grupe me nga 6 skuadra dhe 2 grupe me nga 5 të tilla. Shqipëria U-21 ishte e pozicionuar në vendin e 36-të në UEFA. Nëntë skuadrat e renditura në vendet e para të grupeve në përfundim të fazës kualifikuese së bashku me tre vendet e dyta më të mira kalojnë direkt në fazën finale të turneut. Ndërsa gjashtë vendet e tjera të dyta do të përballen në fazën “play-off” për të siguruar edhe tre biletat e fundit për finalen e turneut. Ndeshjet e fazës “play-off” do të luhen në datat 11-19 nëntor 2024.