Shqipëria e nis me humbje Europianin, Zvicra na mund sërish

Shqipëria e nisi me humbje Kampionatin Europian, duke u mundur nga Zvicra me rezultatin 1-0. Një humbje që djeg shumë po të mendohet se në stadiumin e Lensit ishin mbi 20 mijë tifozë shqiptarë, që bënë një performancë fantastike. Edhe skuadra luajti mirë në tërësi, por rezultati u kushtëzua nga dy episode. Në minutën e 5-të një dalje e gabuar e Berishës, rrëzim i Mavrajt në zonë dhe gol i kundërshtarit me kokë, ndërsa në minutën e 35-të Lorik Cana merr kartonin e dytë të verdhë duke bërë që Shqipëria të mbetej me 10 lojtarë. Pjesa e dytë është më e mirë për ne dhe dy raste të arta për shënim nga Sadiku e Gashi nuk u shfrytëzuan si duhet e për pasojë fitoi Zvicra me epërsi të një goli.

Ndeshja

Pjesa e parë ishte një dominim i pastër zviceran në aspektin e aksioneve me gjuajtje në portë, por në lojën e përgjithshme në tërësi pati sinjale të bukura kuqezi që mund të kishin sjellë një panoramë ndryshe sa i takon rezultatit. E vërteta është se Shqipëria u ndëshkua shpejt në këtë ndeshje, që në minutën e 5-të, ku Shar shënoi me kokë pas një goditje këndi. Ishte një dalje tejet e gabuar e portierit Berisha, njëherësh edhe mosmbulimi i Shar që sollën ndëshkimin e skuadrës tonë. Për minuta të tëra Zvicra është zot në fushë, qarkullon dendur, krijon raste dhe ka saktësi të lartë pasimi. Tanët e morën veten pas minutës së 15-të dhe balancuan lojën në të gjitha repartet. Problemi i tanëve ishte moskoordinimi në lojën në krahë dhe detyrat tejet mbrojtëse të futbollistëve. Gjithsesi, Armando Sadiku ka rastin ideal të barazojë shifrat në minutën e 30-të, por pa sukses, pasi, edhe pse i vetëm me portierin vendas nuk arrin ta kalojë. Më pas vjen dhe zhgënjimi i dytë i madh për ekipin tonë. Lorik Cana merr kartonin e dytë të verdhë në minutën e 36-të, pas prekjes së topit me dorë dhe gjyqtari i jep kartonin e dytë të verdhë, duke e nxjerrë me karton të kuq. Shqipëria mbetet m,e dhjetë lojtarë mnë fushë. Për Zvicrën, goditjen e dënimit në kufijtë e zonës e gjuan Xhemaili, i cili godet shtyllën. Më pas Zvicra ka dhe një tast tjetër me Seferoviç, por këtë herë Berisha është në lartësinë e duhur, duke grushtuar. Një tjetër rast me Xhemailin u regjistrua në minutën e 40-të, por topi përfundoi jashtë, ku fati ishte me ekipin tonë. Në mbyllje të pjesës së parë Shqipëria ka sërish një shans me Lenjanin, por gjuajtja e tij devijohet nga mbrojtja helvete. Në pjesën e dytë skuadra jonë pozicionohet mirë dhe trajneri De Biazi nuk bën ndryshime në mbrojtje, duke kthyer pas Burim Kukelin, i cili e mbulon mjaft mirë këtë rol, madje duke luajtur më mirë se sa Cana. Loja e skuadrës tonë tenton kundërsulmin, por Sadiku i vetëm në sulm është i mbuluar nga tre lojtarë. Zviceranët tentojnë të shënojnë edhe golin e dytë dhe të nokautit, por hasin në saktësinë e mbrojtjes tonë që nuk lë hapësira. Portieri Berisha bën dy pritje vendimtare në pjesën e dytë, duke mbajtur ekipin në lojë. Pas minutës së 70-të de Biazi nis të bëjë zëvendësimet, duke futur në fushë Kaçen, Cikalleshin dhe Gashin. Shqipëria rriti ndjeshëm lojën sulmuese dhe krijon raste, por kulmi i forcës tonë arrihet në minutën e fundit të lojës, kur Shkëlzen Gashi kujtohet në pozicion jashtë loje dhe zbulohet i vetëm përpara portierit, por gjuajtja e tij lë për të dëshiruar dhe devijohet nga portieri zviceran, duke humbur kështu një shans të artë për barazimin. Zvicra e fitoi ndeshjen, madje në mënyrë të merituar dhe pa u sforcuar aq shumë, kurse skuadra jonë ka ende shumë për të mësuar rreth gabimeve të saj në fazën mbrojtëse, por edhe kur paraqiten rastet të ketë më shumë efikasitet.

Adriatik BALLA