Shqipëri e vakët barazon me Estoninë, Reja e mbush “kupën”

Shqipëria mori dje një tjetër rezultat zhgënjyes me ekipin kombëtar. Barazoi 0-0 me Estoninë në një duel miqësor ku përveçse të testoheshin lojtarët e rinj duheshin krijuar mundësitë e një performancë cilësore dhe natyrisht një rezultati më të mirë, pra fitore. Por fitorja mungoi dhe kuptohet presioni bie mbi lojtarët dhe vetë trajnerin Edi Reja. Ky presion mund ta vendosë “plakushin” italian në pozitat e dorëheqjes nëse kreu i FSHF-së Duka reflekton në kohën e duhur. Në të kundërt do të vijojmë të notojmë në të njëjtat ujëra me objektiva të parealizuar dhe me probleme serioze për vazhdimësinë e skuadrës përfaqësuese. Trajneri Edi Reja nuk ka dhënë shenja se do të tërhiqet, duke e lënë për në shtator punën e qëndrimit ose jo në krye të pankinës kuqezi, por rezultatet e këtij qershori do ta përcëllojnë jo pak pozitën e tij në krye të Kombëtares. Prej kohësh specialistët tanë lëshojnë alarmin që Reja është i vjetër për një ekip të ri si Shqipëria.

Ndeshja

Shqipëria harron të fitojë. Zhvillon tri ndeshje në harkun kohor të një jave dhe praktikisht nuk fiton asnjërën prej tyre. Ka probleme të theksuara në mbrojtje, mesfushë e në sulm. Kuqezinjtë nuk kanë qartësi në lojë, ata sillen në fushë në mënyrë të paorientuar dhe normalisht loja e dobët prodhon rezultate të dobëta. Në miqësoren e djeshme ndaj Estonisë skuadra krijoi raste, luajti më mirë se kundërshtari, por përballë një ekipi të tillë modest duhej rezultat maksimal gjë që nuk erdhi. Trajneri Reja kishte zgjedhur t’u japë mundësinë lojtarëve që ishin aktivizuar pak ose aspak në dy ndeshjet e Ligës së Kombeve, teksa nga minuta e parë luajtën emra si Bajrami, Mihaj, Hoxhallari, Çokaj, Seferi e Ramadani. Në pjesën e parë kuqezinjtë patën iniciativën, por nuk arritën të konkretizojnë në raste, teksa mundësinë e vetme për shënim e pati në kokë Vrioni, që gjuajti me kokë, por topi përfundoi mbi tra. Në pjesën e dytë trajneri Edi Reja aktivizoi Uzunin dhe Brojën, për t’i dhënë ritëm lojës sulmuese, por rezultati nuk ndryshoi, edhe pse u krijuan disa raste shënimi. Dy herë portieri kundërshtar u bë pengesë për shënimin e golit, teksa në 2-3 raste të tjera Uzuni u tregua i pasaktë në gjetjen e portës, duke bërë që Shqipëria ta mbyllë pa fitore edhe këtë takim. Pra, barazim 0-0, e asgjë më shumë. Kombëtarja jonë do të kthehet në fushë më 24 dhe 27 shtator, për ndeshjet e Ligës së Kombeve ndaj Izraelit dhe Islandës, ku do të përcaktohen edhe fituesja e grupit që ngjitet në Ligën A, si dhe ajo që zbret një ligë më poshtë. Kjo periudhë mbyllet me zhgënjim të madh për kuqezinjtë, që nuk tregohen në lartësinë e pritshmërive që kishin fansat para ndeshjeve. Mungesa e golave dje tregoi se s’kemi sulm cilësor, kurse pësimi i golave me Izraelin e Islandën tregoi se mbrojtja ka probleme të vazhdueshme. Nga ana tjetër, në mesfushë mungon vizioni dhe lojtarët që bëjnë diferencën, për pasojë rrimë në vend të fundit në grupin e dytë të Ligës B, në Ligën e Kombeve.