Shqipëria ia doli, organizoi një finale të madhe europiane

Për Shqipërinë ishte hera e parë që priste një aktivitet kaq madhor në futbollin europian. Kryeqyteti ynë, Tirana, u shndërrua të paktën për një ditë në qendrën europiane të sportit dhe rinisë, duke mbledhur në gjirin e saj personalitete të futbollit dhe institucioneve sportive nga rajoni e Europa por edhe mjaft huliganë me të cilët nuk ishte përballur më parë policia jonë. Rrugët e Tiranës për dy netë me radhë kanë qenë skenë e përplasjeve të forta, gjë që ka detyruar forcat e rendit të përdorin jo vetëm shkopinjtë e gomës, por në mjaft raste edhe gazin lotsjellës për të shpërndarë turmat e irrituara dhe krejtësisht jashtë kontrollit. Holandezët disi më të dhunshëm se italianët, ndërkohë që birraritë në rrugët kryesore të Tiranë kanë pasur punë në maksimum me tifozerinë e Fejnordit. Italianët kanë zgjedhur anën jugore të qytetit, pranë kodrave të Liqenit, kurse holandezët e Roterdamit rrugët pranë ministrive dhe qendrës. Në tërësi atmosfera pozitive dhe festive ka mbizotëruar në shumicën e grupeve, kurse elementët problematikë u depërtuan që në orët e vona të mbrëmjes së të martës e sidomos gjatë paradites së djeshme. Shumë të tjerë u proceduan për dhunim të dyqaneve dhe shkatërrim të pronës publike.

Festimet e kryeministrit Rama me personalitetet e UEFA-s

Federata Shqiptare e Futbollit organizoi dje një drekë me miqtë e ardhur me rastin e finales së Conference League, duke filluar që nga Presidenti i UEFA-s, Aleksander Ceferin, zyrtarë të lartë të qeverisë së futbollit europian, presidentë federatash, drejtues dhe legjenda të klubeve finaliste, Roma dhe Fejnord. Në këtë drekë ishte i pranishëm edhe Kryeministri Edi Rama, Ministrja e Arsimit, Rinisë dhe Sportit, Evis Kushi, Ambasadori shqiptar i UEFA Conference League, Lorik Cana, Presidenti i Federatës së Futbollit të Kosovës, Agim Ademi, Presidenti i Federatës së Futbollit të Maqedonisë së Veriut, Muamed Sejdiu, si edhe drejtues e anëtarë të Komitetit Ekzekutiv të FSHF-së. Në një atmosferë të shkëlqyer dhe tejet të ngrohtë, Presidenti Duka ka falënderuar UEFA-n për besimin që i dha FSHF-së si partner zyrtar i finales së Conference League, teksa ka vlerësuar edhe mbështetjen e qeverisë dhe Kryeministrit Rama për organizimin sa më të mirë të kësaj ndeshjeje historike ndërkombëtare, AS Roma-Fejnord, e para e këtij niveli që zhvillohet në vendin tonë. Përveç zyrtarëve më të lartë të UEFA-s këtij takimi iu bashkuan edhe legjenda e Romës, Françesko Toti, dhe ish-futbollistët e famshëm Luigji Di Biaxhio, Aldair Naskimento dos Santos, Vincent Candela.

Stadiumi dhe masat

Duhet thënë se stadiumi “Air Albania” mori vlerësime maksimale nga përfaqësuesit e UEFA-s, por edhe nga personalitetet e sportit, të cilët, edhe pse pranuan kapacitetin e vogël të tij, sqaruan se ai ishte krejtësisht modern dhe mjaft cilësor në funksionet e tij. Stadiumin e lavdëroi edhe vetë trajneri i Romës Hoze Murinjo, por edhe trajneri i Fejnordit Slot. Masat e marra nga autoritetet shqiptare ishin maksimale dhe në tërësinë e saj si forca policore jashtë stadiumit, ashtu dhe stjuartët brenda impiantit u treguan profesionistë.