Shqipëria zhgënjen me ishujt Faroe, por barazimi e çon në Europian si e para e grupit E

Në një atmosferë elektrizuese nisi ndeshja e mbrëmshme midis Shqipërisë dhe Ishujve Faroe, në një stadium që ishte ngjyrosur i tëri kuqezi, me një prani në kapacitetin e plotë të impianbtit në "Air Albania". padyshim që të dyja palët vinin të qeta në këtë duel, nisur nga fakti se Shqipëria e kishte siguruar kualifikimin, kurse Ishujt Faroe në vend të fundit thjesht luanin për të prodhuar lojë cilësore dhe dinjitoze. Trajneri Silvinjo kishte hedhur në fushë një 11-she me shumë ndryshime, ku luanin nga minuta e parë Strakosha, Balliu, Bare, Daku dhe Uzuni. Kjo dhe për faktin se trajneri dëshiroi në këtë fund që të luanin ata që kishin marrë më pak minuta në duelet e mëdha të muajve të fundit.

Pjesa e parë

Minutat e para janë të vështira, pasi miqtë kanë shtatlartësi dhe dominojnë fizikisht, edhe pse kontrollin e topit e kanë tanët.  Madje goditja e parë drejt portës u regjistrua nga Ishujt Faroe në minutën e 9-të. Për minuta të tëra në fushë ka duele të ashpra dhe një lojë të fortë taktike, ndërkohë që ka dhe ndërprerje sepse u dëmtuan dy lojtarë miq. Rasti i parë për tanët regjistrohet në minutën e 35-të, me një goditje të Bajramit nga jashtë zone që ndalet nga portieri i Ishujve Faroe. Në fundin e pjesës së parë skuadra jonë do ta shtonte disi volumin në sulm, ku krijon dy raste, fillimisht me Uzunin e më pas me Dakun. Ky i fundit në minutën e fundit të kësaj pjese ishte shumë pranë golit, por portieri mik bëri superpritje.

Pjesa e dytë

Pritej që trajneri Silvinjo të bënte ndryshime, në mënyrë që ekipi të shohte më shumë nga sulmi. Por me kalimin e minutave loja bie në apati dhe tanët fërshëllehen nga tifozët që duan më shumë sulm dhe më shumë entuziazëm nga lojtarët. Në minutën e 61-të Silvinjo ndërhyn dhe aktivizon Laçin e Muçollin në mesfushë në vend të Bares dhe të Uzunit. Loja merr pak gjallëri dhe tanët përpiqen të gjejnë hapësirë. Rasti më i mirë është ai i Asanit me një gjuajtje nga brenda zone në minutën e 67-të, por sfera devijohet e përfundon jashtë. Por miqtë mbrohen me forca të shumta dhe qëndrojnë në lartësinë e duhur. Në të 72' Asllani tenton me një goditje ballore nga jashtë zone, por pa sukses, topi përfundon mbi tra. Në të 74' del Daku e futet Cikalleshi, por merr menjëherë karton të verdhë për një ndërhyrje të gabuar. Tempi i lojës bie sërish, madje janë Ishujt Faroe që ushtrojnë presion.  Edhe pse trajneri Silvinjo futi në fund edhe Muçin, sërish loja e kuqezinjve nuk pati lartësinë e kërkuar. Minutë pas minute Ishujt Faroe e administruan mjaft mirë mbrojtjen dhe ia doli në fund të marrë një pikë. Pra barazim 0-0, rezultat zhgënjyes, e megjithatë Shqipëria ruan vendin e parë në grupin E, me 15 pikë, po kaq sa Çekia që mundi mbrëmë Moldavinë 3-0 dhe përfundoi e dyta. Si shqiptarët dhe çekët shkojnë në Europian. Ishujt faroe mbeten në vendin e fundit me 2 pikë, por për ta ishte një fushatë eliminatore e suksesshme, pasi nuk e mbyllën me zero pikë sikurse bëjnë shumë skuadra të vogla. U morën pikë shqiptarëve dhe moldavëve. Polonia ishte zhjgënjimi më i madh i këtyre eliminatoreve. Polakët e mbyllën në vend të tretë me 11 pikë. Kurse Moldavia e mbylli në vend të katërt me 10 pikë, por bëri një fushatë kualifikuese interesante dhe mjaft emocionuese.