Silvinjo “fërkon” duart, dëmtimi i Uzunit s’është serioz, do të jetë ndaj Çekisë

Kombëtarja do të luajë me Çekinë më 12 tetor dhe trajneri Silvinjo kërkon një grup sa më të plotë. Por dëmtimi i Myrto Uzunit mbrëmjen e së enjtes solli shqetësim për stafin e Granadës, por edhe të përfaqësueses kuqezi, ku Silvinjo u interesua menjëherë. Gjithsesi, për këtë ka lajme të mira, pasi nuk ka dëmtim afatgjatë. Lojtari do të jetë i gatshëm për duelin me çekët. Kështu, Silvinjo dhe te Granada mund të marrin frymë lirisht. Dëmtimi i Myrto Uzunit nuk është serioz. Sulmuesi kuqezi la fushën e lojës i dëmtuar të enjten që në minutën e 38-të gjatë ndeshjes Granada-Betis. Duke alarmuar jo vetëm klubin e tij, por dhe Shqipërinë. Për shkak se pas më pak se dy javësh do të luhet sfida mes kuqezinjve dhe Çekisë. Pas ndeshjes së La Ligës trajneri i Granadës, Pako Lopez, u shpreh se Uzuni prej disa javësh ka sakrifikuar për skuadrën duke luajtur me injeksione. Dhe që dëmtimi i beratasit e shqetëson. Edhe pse informacioni për gjendjen e sulmuesit ka munguar në mediat spanjolle, ashtu si dhe një buletin mjekësor nga ana e klubit “nga burime të afërta me lojtarin mësohet se nuk bëhet fjalë për një dëmtim serioz. Uzuni u largua nga fusha e lojës për shkak të një problematike që lidhje me muskujt e barkut. Testet pas sfidës kanë konfirmuar se gjendja e tij është e qëndrueshme dhe zëvendësimi erdhi për të shmangur rrezikun e një dëmtimi më serioz. Një lajm shumë i mirë për Shqipërinë, që do të ketë të gatshëm për “finalen” me Çekinë (12 tetor) një nga lojtarët që ka më shumë minuta në këmbë. Uzuni është një nga lojtarët më të rëndësishëm te Granada, teksa edicionin e shkuar ishte lojtari që dha kontributin më të madh për t’u ngjitur në elitën e futbollit spanjoll. Këtë edicion, 28-vjeçari është lojtari i tretë me më shumë minuta tek Granada. Teksa ka arritur që të shënojë dhe dy gola. Uzuni mund të lihet pushim në ndeshjen e javës së tetë mes Almerias dhe Granadës (1 tetor), që të jetë plotësisht gati në vijim për Kombëtaren e Shqipërisë.

Bajrami, lojtari që “ekzekuton” klubet e mëdha italiane

Fantazisti i Kombëtares, Nedim Bajrami, po kalon një formë fantastike, teksa edhe në ndeshjet me përfaqësuesen ishte një ndër lojtarët më të dalluar në fushë. Një pikë në Çeki padyshim që erdhi si meritë e tij. Por 24-vjeçari ka shënuar që në momentin kur është aktivizuar në Serinë A. Mediat italiane shkruajnë se Bajrami është “vrasësi” i skuadrave të mëdha dhe nëse bëjmë një bilanc, janë 8 golat që ai ka shënuar kundër ekipeve me emër në Itali, ndërsa ndaj skuadrave të vogla në total ka gjetur 7 herë rrugën e rrjetës. Kjo tregon se objektiv i asgjësimit të tij janë kryesisht klubet e mëdha. Gjithçka nisi me Napolin para dy vitesh ku gjatë një ndeshjeje Kupe, Empoli u mposht 3-2 dhe të dy golat i shënoi Nedimi. Më pas do të ishte Milani. Në 22 dhjetor 2021, mesfushori do të shënonte në portën e Menjasë, edhe pse në fund kuqezinjtë fituan 4-2. Nuk kalon shumë kohë dhe brenda janarit të 2022-shit, Bajrami do t’i shënonte Lacios, Interit dhe Romës. “Viktima” e radhës do të ishte sërish Milani, në nisje të sezonit të kaluar. Arrijmë te goli i tetë ndaj të mëdhave dhe ai është ndaj Interit këtë sezon. Deri tani, mesfushori kuqezi nuk ka mundur t’i shënojë vetëm Juventusit.