Silvinjo uron Asllanin për Kupën e Italisë, bëhen 5 shqiptarët që e fitojnë këtë trofe

Në përfundim të sezonit disa lojtarë shqiptarë po shijojnë sukseset me skuadrat e tyre e një ditë pas Qazim laçit që fitoi titull në Çeki, mbrëmjen e së mërkurës ishte radha e Kristjan Asllanit të shijonte fitoren e Interit në finalen e Kupës së Italisë, një sukses i rëndësishëm për lojtarin shqiptar që këtë sezon luajti me fanellën zikaltër dhe ka marrë vlerësime të mira për performancën e tij, pavarësisht se luan në një ekip ku ka rivalitet dhe sidomos roli në fushë është më shumë se me rivalitet me emra të spikatur të futbollit europian. Fitorja e Kupës e ka radhitur Asllanin në rangun e fituesve dhe kjo do të thotë shumë për mesfushorin kuqezi, i cili pritet të marrë rol organizatori në dy ndeshjet zyrtare që Kombëtarja do të luajë ndaj Moldavisë dhe Ishujve Faroe në muajin qershor. Ndaj komentet dhe vlerësimet për mesfushorin shqiptar nuk kanë ardhur vetëm nga italianët në mediat sportive italiane dhe më gjerë, por edhe nga radhët e stafit të Kombëtares, që po e inkurajojnë lojtarin të ruajë formën e tij.

Shqiptarët që fituan kupën e Italisë

Naim Kryeziu (Roma), Lorik Cana (Lacio), Thomas Strakosha (Lacio), Elseid Hysaj (Napoli) dhe Kristjan Asllani (Inter), janë pesë futbollistët shqiptarë që kanë fituar trofeun e Kupës së Italisë. Pavarësisht minutazhit të pakët në këtë sezon, për Kristjan Asllanin, ky trofe e bën mesfushorin e talentuar 21-vjeçar një nga 5 lojtarët e vetëm shqiptarë, që e kanë provuar shijen e Kupës së dytë më të rëndësishme në futbollin italian, pas Serisë A. Gjithsesi e ardhmja e Asllanit, në sezonet në vijim pritet të jetë akoma dhe më e ndritur dhe pse jo të shoqërohet me trofe të tjerë të rëndësishëm.

Duka dhe Silvinjo urojnë Asllanin

Kristjan Asllani, mesfushori i talentuar shqiptar i Interit, ngriti mbrëmjen e kaluar së bashku me skuadrën zikaltër Kupën e Italisë për edicionin 2022-2023. Djaloshi shqiptar ka dhënë kontributin e tij të jashtëzakonshëm përgjatë këtij sezoni me ekipin e Interit, jo vetëm në Serinë A, por edhe në kompeticionet e tjera ku skuadra zikaltër ka marrë pjesë. Kristjan Asllani bëhet kështu futbollisti i pestë shqiptar, i cili ia doli të provojë edhe këtë sukses, duke fituar Kupën e Italisë. Ndërkaq, djaloshi kuqezi dhe skuadra e Interit kanë siguruar gjithashtu edhe finalen e kompeticionit më të rëndësishëm në Europë, kundër Mançester Sitit. Cilësitë e larta të futbollistëve kuqezi që luajnë në kampionatet më të rëndësishme në Europë është një lajm shumë i mirë edhe për Shqipërinë e futbollit, që synon kualifikimin në finalet e Europianit 2024. Presidenti i Federatës Shqiptare të Futbollit, Armand Duka, trajneri Silvinjo dhe stafi i Kombëtares përshëndesin mesfushorin Kristjan Asllani për këtë triumf të dytë sezonal me skuadrën e Interit, duke i uruar suksese dhe të ngjitet sa më lart në arenën ndërkombëtare të futbollit dhe e mirëpresin për dy ndeshjet e ardhshme të Shqipërisë kundër Moldavisë e Ishujve Faroe. Suksesi i Kristjan Asllanit është edhe suksesi i Shqipërisë!