Situata/ Prishtina eliminon Ballkanin e Dajës nga Kupa e Kosovës

Trajneri Ilir Daja u trondit dje në Kosovë pasi skuadra e tij, Ballkani, u eliminua nga Kupa e Kosovës dhe eliminimi vë në vështirësi serioze stafin dhe kryesisht trajnerin. Kështu, Prishtina eliminon Ballkanin nga Kupa e Kosovës. Skuadra kryeqytetase ia doli të triumfojë 2-0 ndaj kampionëve në fuqi dhe të sigurojë kualifikimin për në gjysmëfinalet e kompeticionit. Debutim perfekt për Debatik Currin në pankinë, pasi ish-mbrojtësit të Kombëtares Shqiptare iu besua drejtimi i skuadrës dy ditë më parë, pas shkarkimit të Ismet Munishit. Prishtina ia doli të shënojë golin e avantazhit në minutën e tretë shtesë të pjesës së parë me anë të mesfushorit Kreshnik Uka, i cili ekzekutoi saktë një penallti. Në minutën e 59-të ishte Genc Hamiti që ndëshkoi për herë të dytë kampionët në fuqi të Kosovës, duke vulosur kështu kualifikimi ne Prishtinës në gjysmëfinale. Krahas kryeqytetasve, në gjysmëfinale u kualifikuan edhe Gjilani, që mposhti 1-5 Trepçën ’89, Vushtria që triumfoi minimalisht 1-0 ndaj Beharit dhe Llapi që mposhti Malishevën me penallti, pasi koha e rregullt u mbyll 2-2. Për t’u kthyer tek Ballkani i Dajës, tani i duhet të mendojë për kampionatin.