Skënderbeu bie zyrtarisht, Dinamon e mban matematika, Teuta shpreson Europën

Java e 33-të e Kategorisë Superiore u mbyll dje me takime interesante dhe njëherësh rezultate interesante, por me disa verdikte që vlejnë të diskutohen dhe të analizohen nga klubet respektive. Edhe zyrtarisht, Skënderbeu i Korçës bie nga kategoria, duke u kthyer kështu në Kategorinë e Parë pas 13 vjetësh në elitë. Një prej klubeve më cilësore të dekadës së fundit, që arriti dy herë në fazën e grupeve të Ligës së Europës, do të jetë sezonin tjetër në kategorinë inferiore, për ta nisur dhe një herë nga fillimi. Barazimi i djeshëm me Dinamon ishte vendimtar, edhe pse duhen dhe tre xhiro të mbyllet gara në Superligë.

Ndeshja

Skënderbeu barazoi dje 1-1 me Dinamon. Korçarët në fakt ishin duke marrë një fitore deri në minutën e 90-të falë golit të Berishës, por një penallti e akorduar në fund nga arbitri Enea Jorgji pas edhe ndërhyrjes së VAR-it dhe e shndërruar në gol nga Sabien Lilaj bëri që në fund bardhekuqtë të dilnin kokulur nga stadiumi i Kamzës.Nga ana tjetër, edhe blutë e kryeqytetit janë “buzë greminës” dhe aktualisht i mban në lojë vetëm matematika duke qenë se kur kanë mbetur edhe nëntë pikë në lojë, gjenden po minus nëntë pika nga Egnatia e vendit të tetë. Që do të thotë ndryshe se Dinamo shpëton po të fitojë të tre takimet dhe Egnatia t’i humbasë të tri ndeshjet e saj. Sa i takon kronikës së ndeshjes me Skënderbeun, në fraksionin e parë, Dinamo ishte më kërkuese dhe pati mundësitë e saj me anë të Ibraimit dhe Rexhinaldos.Ndërsa nuk mungoi edhe Imami me kokë, por portieri Rexhepi tregoi një formë të shkëlqyer. Sa i takon fraksionit të dytë, rastin e parë e patën korçarët në minutën e 70 me anë të Berishës i cili nuk kishte fatin në anën e tij dhe u ndal nga traversa. Gjithsesi, në të 83-tën, Berisha gjeti rrugën e rrjetës duke mposhtur nga fare pranë portierin Simoni i cili nuk kishte shumë për të bërë.Ndërkaq, Dinamo provoi të reagonte me Rexhinaldon por sulmuesi gaboi shënjestër dhe në fund. Megjithatë, penalltia në fund ndryshoi gjithçka me Dinamon që rri në lojë vetëm matematikisht.

Teuta thyen Egnatian, shpreson ende Europën

Teuta mundi 3-1 Egnatian. Pesë janë ndeshjet radhazi pozitive për djemtë e Renato Arapit (3 fitore dhe 2 barazime).Suksesi ishte i treti për këtë edicion ndaj ekipit të Zekirija Ramadanit dhe e çon në 9 pikë diferencën e Teutës me Egnatian e vendit të tetë, duke u shkëputur përfundimisht nga zona “play-out”.Ledio Beqja zhbllokoi me kokë ndeshjen në minutën e nëntë. Goli i parë në Superiore për20-vjeçarin, teksa katër minuta më vonë Teuta gjeti golin e dytë falë një finalizimi të bukur të Klejdi Dacit.Delarge shkurtoi diferencën në fundin e pjesës së parë, por anësori e anuloi për pozicion të parregullt të sulmuesit afrikan. Ergys Peposhi veproi bukur në minutën e 60-të, duke realizuar golin e tretë për Teutën. Magani shënoi golin e nderit për Egnatian.