Skuka shumë pranë Metzit në Francë, Partizani fiton 1 mln euro nga sulmuesi

Sulmuesi i Partizanit, Xhuljano Skuka, do të jetë pjesë e Metz në kampionatin francez në pjesën e mbetur të sezonit. Sipas “SuperSport”, 24-vjeçari dibran ka udhëtuar drejt Francës dhe të hënën do të kryejë vizitat mjekësore e më pas do të firmosë kontratën e re me klubin francez. Hap i madh për futbollistin e Partizanit që do të jetë pjesë e një skuadre që luan në ligën e dytë franceze. Aktualisht Metz ndodhet në vendin e tretë të renditjes, me 31 pikë, dy më pak se vendi i dytë që ngjitet në Ligue 1. Këtë sezon Skuka ka shënuar 10 gola në 16 ndeshje, duke qenë shënuesi i dytë më i mirë pas Redon Xhixhës. Sulmuesin e favorizon ndjeshëm fakti që posedon pasaportë franceze, pasi në të shkuarën ka jetuar në Francë dhe është i ambientuar. Pasi të zyrtarizohet gjithçka lojtari do të bashkohet me ekipin për të nisur përgatitjet që të ndihmojë ekipin në pjesën e mbetur të sezonit, që të arrijë një nga dy vendet e para, në mënyrë që sezonin e ardhshëm të jetë pjesë e elitës së futbollit francez. Të hënën do të zbulohen edhe detajet e kontratës, që aktualisht mbahen të fshehura nga klubi francez, i cili do të paguajë një shumë të majme te Partizani për kartonin e lojtarit. Ndërkohë, tek Partizani po bëjnë gati zëvendësimin e bomberit me një nigerian që ka shkëlqyer në pjesën e parë të këtij sezoni në Kosovë. Bëhet fjalë për sulmuesin 23-vjeçar, Kristian Mba, i cili në 18 ndeshje ka shënuar 10 gola dhe ka dhënë 5 asiste me klubin nga Mitrovica, Trepça ‘89. Drejtuesit e Partizanit kanë biseduar me klubin mitrovicas për blerjen e kartonit të Mba dhe në parim kanë arritur akordin. Trepça mësohet se kërkon të mbajë në pronësi një përqindje të kartonit dhe në orët në vijim gjasat janë që marrëveshja të jetë totale mes palëve.