Sulmuesi/ Kilian Mbape refuzoi ofertën e Liverpulit, mbetet i PSG-së

Merkato nuk mund të prodhojë sensacion shumë të madh nëse transferimi nuk lidhet me emrin e ndonjë futbollisti të spikatur. Kalimi i Ronaldos nga Junajtid anglez tek Al Nasr në Arabinë Saudite ishte padyshim momenti më emocionues i kësaj merkato dimërore. Kjo lëvizje i eklipsoi të gjitha të tjerat edhe për faktin se në këtë transferim u luajtën milionat e sheikëve. Por në fokus të merkatos ishte dhe sulmuesi i PSG-së, Kilian Mbape, që mori ofertë nga një klub i Premier League. Por lojtari refuzoi t’i bashkohej Liverpulit në verën e vitit të kaluar për një transferim rekord prej 200 milionë eurosh. Kështu ka raportuar “The Athletic”. Sajti anglez raporton të enjten se Mbape përbuzi ofertën e Liverpulit. Sulmuesi 24-vjeçar i Francës vazhdoi kontratën me PSG-në deri në qershor të vitit 2025. Megjithatë, Liverpuli ende nuk ka hequr dorë nga francezi. Krahas Liverpulit, interesim për yllin e PSG-së kanë edhe Mançester Junajtid, Real Madridi, Mançester Siti dhe Çelsi. Sezonin aktual ka shënuar 22 gola dhe ka kontribuar me 5 asiste. 7 gola e 3 asiste i ka edhe në 6 takime në Ligën e Kampionëve.