Super Real Madrid shkatërron Liverpulin, Siti fitore “in extremis” me Dortmundin

Reali i Madridit tregoi dhe një herë mbrëmë se ka staturë të fortë në UEFA Champions League, një skuadër që edhe në ditën e vet më të keqe është e aftë të rivalizojë për titullin europian. Edhe pse po kalon një moment të vështirë, Reali i trajnerit Zinedin Zidane ia doli dje të befasonte në duelin e parë të çerekfinaleve të Champions, Liverpulin, duke e mundur me rezultatin 3-1. Edhe pse në pjesën e parë Liverpuli pati një dominim të lehtë në mbajtjen e topit, duhet thënë se në të gjithë treguesit e lojës Reali ishte shumë lart, qoftë në aksionet sulmuese, goditjet drejt portës, goditjet e këndit dhe në tërësi gjuajtjet drejt kuadratit. Në fakt, skuadra e trajnerit Zidane gjeti golin e parë me Vinicius, në minutën e 27-të, pas asistimit të Toni Krosit. Ishte një gol që e çliroi plotësisht skuadrën madrilene, e cila me përvojën e saj në Champions diti të menaxhonte me racionalitet aksionet e saj sulmuese. Ky racionalistet në veprimet tekniko-taktike i dha Realit epërsi që e shfrytëzoi dhe në minutën e 36-të, kur Asensio shënoi golin e dytë, pas një gabimi të mbrojtjes angleze, duke e dërguar Realin në pushimin midis dy pjesëve në epërsi 2-0. Me fillimin e pjesës së dytë Liverpuli do të ngushtonte rezultatin, duke u futur në lojë për rezultat pozitiv. Mohamed Salah shënoi në minutën e 51-të, por u deshën dy minuta që gjyqtari i njohur Feniks Brysh të vendoste për gol të rregullt. Me kalimin e minutave Reali nisi të administrojë më mirë lojën dhe ta rrisë tempin e forcës së tij në ofensivë. Për pasojë, në minutën e 65-të, asisti i Luka Modriç shndërrohet në gol nga Vinicius që ishte dhe “ylli” i mbrëmjes së djeshme. 3-1 për Realin dhe ndeshja mori “zjarr” në të dy kampet. Gjithsesi, deri në fund nuk pati ndryshim rezultati dhe fitoi Reali i Madridit, që me këtë fitore bën një hap drejt gjysmëfinaleve. Ndërkohë, po mbrëmë, Mançester Siti i trajnerit Pep Guardiola, që llogaritet si një prej favoriteve të trofeut të Champions, u përball me Borusian e Dortmundit, në një ndeshje shumë të fortë. Anglezët dominuan në statistikat e ndeshjes, por depërtimi në thellësi para portës ishte i vështirë. Sidoqoftë, goli i de Bryjnit që u asistua nga Mahrez në minutën e 19-të, i shërbeu skuadrës së Guardiolës të kishte nën kontroll takimin dhe të dominonte veçanërisht mesfushën. Pjesa e parë u mbyll me këtë rezultat (1-0), kurse në pjesën e dytë pati më shumë ritëm dhe më shumë përpjekje edhe nga gjermanët. Edhe pse Siti dominoi në kontrollin e topit falë filozofisë së lojës së Guardiolës, gjermanët u treguan të barabartë në treguesit sportivë të lojës. Përpjekjet e Mançester Sitit për të barazuar dhanë efekt në minutën e 84-t, ku asistimit të Erling Haland iu përgjigj si duhet veterani Marko Rojs, që shënoi golin e barazimit për gjermanët. Ky gol nuk e “vrau” skuadrën e Guardiolës, pasi në minutën e 01-të anglezët gjetën golin e dytë me anë të Foden, që riktheu avantazhin dhe qetësinë e Sitit. Sot luhen dy takimet e tjera çerekfinale, ku Porto pret Çelsin dhe Bajerni i Mynihut pret francezët e PSG-së.