Surpriza në kampionatin italian, Udineze shkatërron Interin, Monza shtang Juventusin

 Monza arrin fitoren e parë dhe historike në Serie A italiane, pasi mundi ekipin më të trofeshëm të futbollit italian, Juventusin. Fitorja 1-0 u vendos nga goli i lojtarit danez, Gytkjaer, në minutën e 74-t. Pritej reagimi i Juventusit në fakt, që vinte në këtë takim me shumë mungesa, përfshi edhe ato të Alegrit, Kuadrados e Milik të pezulluar, megjithatë bardhezinjtë vuajtën jo pak dhe në fundin e pjesës së parë mbetën me 10 futbollistë, pasi Di Maria goditi kundërshtarin me bërryl dhe u ndëshkua me karton të kuq. Me një lojtar më pak dhe me shumë të rinj në fushë, Juventusi rezistoi deri në minutën e 74-t, kur Gytkjaer dërgoi topin në rrjetën e Perin dhe bëri që në stadium të nisë festa, me Monzën që mori kështu fitoren e parë në histori, në Serinë A. Jep efekt kështu edhe ndryshimi i trajnerit, pasi Palladino e nis me fitore eksperiencën e tij te Monza, diçka që paraardhësi i tij, Xhiovani Stropa nuk e bëri në gjashtë javët e para të kampionatit. Nga ana tjetër Juventus ka marrë vetëm 10 pikë në 7 javë dhe është në krizë totale, teksa pankina e Alegrit rrezikohet jo pak. Ndërkohë, Inter pëson humbjen e tretë në kampionat dhe sërish me rezultatin 3-1, ashtu si ndaj Lacios e Milanit. Këtë herë ishte Udineze ajo që përmbysi zikaltrit në “Dacia Arena” dhe u shkaktoi një disfatë që pritet të shkaktojë furtunë në kampin zikaltër. Vetëm 12 pikë në 7 ndeshje janë shumë pak për një skuadër që pretendon titullin kampion, por që ka pësuar plot 11 gola, ndërsa në krahun tjetër Udineze merr kryesimin e renditjes me 16 pikë, pasi ka bërë një barazim e më pas 5 fitore radhazi. Ndërkohë, në një intervistë për “DAZN”, trajneri i zikaltërve, Simone Inzagi, nuk e fshehu zhgënjimin, duke thënë se rivali e meritoi fitoren. “Isha i frikësuar që të luaja me një lojtar më pak. Bastoni dhe Mkitarjani e paguan, kurse Udineze ishte më e kujdesshme. Bastoni donte të qëndronte në fushë, por ato zgjedhje duhej të bëheshin. Unë doja të rregulloja skuadrën pa ndryshuar formën. Pas avantazhit, ne duhet ta menaxhonim lojën në një mënyrë tjetër dhe duhet të bënim më mirë. në pjesën e dytë ne ja dolëm mirë, por më pas bëmë disa gabime dhe i lejuam vetes të pësonim dy gola, nga Udineze bëri shumë mirë. Jam i pari që duhet fajësuar. Ne duhet të bënim patjetër më shumë, Udineze ishte superiore dhe e meritoi plotësisht fitoren. Është e njëjta ndjesi si sezonin e kaluar. Duhet të vazhdojmë të bëjmë më shumë”, u shpreh ndër të tjera trajneri i Interit, Simone Inzagi.