Surpriza/ Reali i Madridit kërkon Armando Brojën, e nxit situata te Çelsi

Lojtarët e Kombëtares, në shumicën e tyre, e kanë bërë zgjedhjen për sezonin e ri. Një pjesë kanë bërë transferime të bujshme, sikurse është rasti i Kristjan Asllanit që u bashkua me Interin, por ka edhe të tjerë që ishin të detyruar të pranonin një nga ofertat sikurse ndodhi me Strakoshën që zgjodhi Brentford, apo Manajn që kali në Champiohsip në Angli me Uotford. I vetmi lojtar nga të rinjtë e përfaqësueses që ende nuk ka marrë një vendim është Armando Broja, i cili pret ose të marrë konfirmim nga trajneri Tuhel se do të jetë pjesë e skuadrës së parë të Çelsit, ose të huazohet në një klub të Premier League (ku Uest Hemi është më kërkuesi), ose të pranojë të shitet në një kampionat tjetër e në një klub tjetër. Pra opsionet janë të hapura, por mediat spanjolle dje kanë surprizuar me lajmin e madh. Në fakt, pranohet që Armando Broja ka spikatur me paraqitjet e tij sezonin e kaluar me fanellën e Sauthemptonit, teksa shumë skuadra janë të gatshme ta bëjnë për vete sulmuesin e Kombëtares shqiptare. Së fundmi prestigjiozja iberike “AS”, ka hapur faqen e parë me objektivat e Realit të Madridit në merkato dhe mes tyre është dhe Armando Broja. Një lajm i bujshëm që vjen nga Spanja ku sulmuesi 20-vjeçar është në “radarët” e një ndër klubet më të mëdha në botë. Së bashku me të si objektiva të merkatos janë edhe Okafor, Ruter, Sesko, Burkardi, Simiç, Brobi dhe Kalajxhiç. Pas eksperiencës si i huazuar te Sauthemptoni, Broja është rikthyer te Çelsi dhe e ardhmja e tij është ende në dyshim të madh.

Qëndrimi i gazetës spanjolle dhe problemi me Çelsin

Nëse lajmi do të kishte dalë nga Shqipëria nuk do të kishte shkaktuar bujë, por kur e fut në shkrim një gazetë e njohur spanjolle dhe e afërt me Realin e Madridit, atëherë ajo merr vlerë. Prandaj dhe lajmi i kalimit të Brojës tek Reali, si mundësi, është me të vërtetë befasues dhe emocionues, paçka se një kalim i tillë është i vështirë të realizohet. “Reali i Madridit është i interesuar për një lojtar shqiptar”. Iberikja “AS” shkruan se në fokusin e kampionëve të Spanjës dhe Europës ka përfunduar Armando Broja, i cili akoma e ka të paqartë të ardhmen me Çelsi. Sulmuesi i kombëtares shqiptare ishte shumë afër Uest Hem, por “Çekiçët” nuk arritën një marrëveshje me Çelsi dhe investuan rreth 42 milionë euro për sulmuesin italian Xhianluka Skamaka. Reali do të blejë një sulmues nëse largohen emra si Dani Kebajos, Marko Asensio apo Borja Majoral. 20-vjeçari shqiptar është një nga objektivat e klubit të famshëm spanjoll. Te Reali vlerësojnë shumë talentin dhe progresin e Brojës në vitet e fundit. Për momentin nuk ka kontakte mes palëve. Drejtuesit e Realit janë fokusuar te merkato në dalje, dhe më pas mund të nisin ofensivën për afrimin e lojtarit të talentuar të kombëtares kuqezi. Tek Reali i Madridit ka shumë rivalitet dhe një rivalitet i tillë mund ta dëmtojë Brojën, sepse do të mbetej në stol, por fakti që e kërkon Reali, tregon shumë për kalibrin e Brojës, pasi është nga të paktët lojtarë shqiptarë, ndoshta i vetmi në historinë e futbollit tonë, që kërkohet nga Reali i Madridit.