Taulant Stërmasi zgjidhet president i federatës së Atletikës, por vetëm për një vit

Taulant Stërmasi do të jetë president i federatës Shqiptare të Atletikës deri në gusht të vitit 2024. Është bërë traditë tashmë që zgjedhjet nëpër federata bëhen me mbylljen e Olimpiadës, ndaj edhe zgjedhjet normale do të zhvillohen në gusht të vitit 2024. Këto të zhvilluara dje ishin zgjedhje të jashtëzakonshme, të ndikuara nga penaliteti që morën krerët e mëparshëm të federatës si pasojë e “falsifikimit” të rezultatit të atletit Izmir Smajlaj.

Zgjedhjet

Federata Shqiptare e Atletikës zhvilloi paraditen e djeshme Asamblenë e Jashtëzakonshme Zgjedhore, pas pezullimit 5 vjet të ish-presidentit, Gjergj Ruli. Taulant Stërmasi është zgjedhur Presidenti i Federatës Shqiptare të Atletikës. Trajneri i mirënjohur mundi në garë Ferdinad Canaj dhe Artan Shytaj. Gjithçka u vendos në raundin e dytë të votimeve pasi në raundin e parë asnjë nga kandidaturat nuk i plotësoi 2/3 e votave. Taulant Stërmasi do të jetë në krye të federatës së atletikës deri më 27 gusht te vitit 2024. Behet fjalë vetëm për një vit mandat sepse në vitin 2024 të gjitha federatat do t’i nënshtrohen procesit të rregullt zgjedhor. Taulant Stërmasi do të zëvendësojë në këtë detyre Gjergj Rulin, i cili është pezulluar nga njësia e integritetit të atletikës deri më datën 8 dhjetor të vitit 2026, së bashku me Nikolin Dionisi i cili mbante pozicionin e sekretarit të përgjithshëm. Dionisi është pezulluar deri më 5 prill 2028. E gjitha kjo situatë është krijuar pas çështjes së manipulimit së rezultatit të Izmir Smajlajt në garën e 8 majit 2021, që ishte 8.16 metra. Atleti Izmir Smajlaj u shpall i pafajshëm nga njësia e integritetit të atletikës, pasi gjykata konstatoi se akuzat kundër tij nuk u vërtetuan, pasi nuk kishte dijeni që ishte përfshirë në komplotin për të paraqitur informacionin e rremë. Në këtë garë ishte edhe biznesmeni Mirton Lika, por ai u tërhoq nga gara 48 orë para zgjedhjeve, duke e lënë atë në dorën e 3 pjesëtarëve dhe anëtarëve të familjes së atletikës. Zgjedhjet për presidentin e Federatës Shqiptare të Atletikës u zhvilluan për një mandat në vazhdim të aktualit, të ish-presidentit Gjergj Ruli, deri më 27 gusht të vitit 2024, për të zgjidhur ngërçin e krijuar me aktivitetet kombëtare dhe ndërkombëtare, të cilat kishin mbetur pezull për shkak të hetimit ndaj ish-drejtuesve të FSHA-së. Më pas do të zhvillohet Asambleja Zgjedhore për një mandat 4-vjeçar.

Objektivat

Federata në këtë njëvjeçar që mbetet deri në Olimpiadë duhet të bëjë maksimumin për të mundësuar sa më shumë sportistë në Lojërat Olimpike Verore të vitit 2024. Këtu nuk bëhet fjalë për Luiza Gegën pasi ajo e ka normën olimpike dhe në garën e saj është një nga më të mirat në botë, kështu që nuk diskutohet pjesëmarrja e saj. Në garë janë Smajlaj, Burraj e ndonjë tjetër, ndaj Stërmasit i del detyrë që të shfrytëzojë maksimumin e kohës për të mundësuar pjesëmarrjen e sportistëve më cilësorë në garat e rëndësishme të atletikës europiane e botërore, gara që kanë vlerë kualifikuese.