Tifozët e PSG-së kërkojnë largimin e Mesit, Ronaldo kthehet në radhët e Portugalisë

Dy prej lojtarëve më të mirë në botë në të gjitha kohërat, Lionel Mesi dhe Kristiano Ronaldo, rivalë të përjetshëm mes tyre, ndodhen në një pozitë të vështirë aktualisht. Kjo ndodh për shkak se lojtarëve u ka humbur freskia e dikurshme dhe nuk janë më në qendër të vëmendjes, paçka se vijojnë të jenë më të paguarit në treg dhe kanë një imazh të fuqishëm. Madje Mesi s’ka pak kohë që ka fituar Botërorin. Por problemi i argjentinasit është dështimi me PSG-në, kurse i Ronaldos se ka përfunduar në një kampionat dytësor si ai i Arabisë Saudite. Sa i takon Mesit, mund të thuhet se kur gjërat nuk shkojnë sipas parashikimeve tifozët të vihen kundër. Kështu, tifozët e Paris San Zhermenit janë zemëruar me ekipin e zemrës për dështimin e radhës në Champions League. Edhe pse drejtuesit nuk po kursehen në afrimin e lojtarëve të mëdhenj, në fushë nuk kanë munguar problemet. Skuadra e Galtier tregoi fare pak ndaj Bajernit të Mynihut. PSG nuk shënoi dot gol në asnjë nga dy ndeshjet ndaj kampionëve të Gjermanisë dhe e meritoi eliminimin. Fitimi i Champions League është kthyer në fiksim në kryeqytetin francez, pasi PSG nuk e ka fituar kurrë më parë këtë trofe. Tifozët nuk kursejnë as Leo Mesin, në hije gjatë dueleve me Bajernin. Një sektor i rëndësishëm i ultrasve të PSG-së po përgatisin të fajësojnë argjentinasin gjatë ndeshjes së fundjavës. “Ne do ta vërshëllejmë atë gjatë ndeshjes me Renes. Ai paguhet shumë krahasuar me atë që jep në fushë. Nuk duam që ai të vazhdojë të jetë pjesë e PSG-së”, shprehen disa nga anëtarët ultras të kampionëve të Francës. Prej ditësh flitet për një transferim të “pleshtit” në Arabinë Saudite, aty ku do të shijojë një “pension” faraonik. Ndërkohë, Kristiano Ronaldo do të përfshihet në skuadrën e Portugalisë për ndeshjet kualifikuese të Euro 2024 këtë muaj kundër Lihtenshtajnit dhe Luksemburgut. 38-vjeçari Ronaldo ishte i shqetësuar për të ardhmen e tij me kombëtaren pas eliminimit në çerekfinale të Kupës së Botës nga Maroku. Ish-sulmuesi i Mançester Junajtid është larguar nga Evropa për t’u bashkuar me Al-Nasr të Arabisë Saudite, por ai mbetet i përkushtuar për të përfaqësuar vendin e tij. Ai do të ftohet nga selektori i Portugalisë, Roberto Martinez. Mediumet në Portugali kanë bërë të ditur se Martinez është takuar me Ronaldon përpara se të vendoste të thërriste sulmuesin e klubit arab. Ronaldo ka shënuar tetë gola në nëntë ndeshje për Al-Nasr. Ai është efikas, por në jo pak raste stadiumi ngrihet në këmbë e brohoret emrin e Mesit, si për të dashur ta vërë në vështirësi.