BREAKING NEWS

Albin Kurti mbylli kufirin me Shqipërinë, vjen reagimi i parë nga kryeministri Rama

Albin Kurti mbylli kufirin me Shqipërinë, vjen reagimi i parë nga
x

Sport

Tirana shuplakë Partizanit, fitore me “pesë yje” dhe një hap drejt titullit

Tirana shuplakë Partizanit, fitore me “pesë yje” dhe

Tirana nën drejtimin e Emanuel Egbosë nuk njeh humbje, jo vetëm kaq, por është shndërruar në një makineri golash e fitoresh dhe me suksesin e djeshëm në derbi ndaj Partizanit hedh një hap të mirë drejt titullit, paçka se gara është ende e gjatë. Kështu, mbrëmë në “Air Albania Stadium” të Tiranës, bardheblutë mposhtën me rezultatin e thellë 5-1 rivalin e vjetër, Partizanin, në një ndeshje spektakolare në të gjitha drejtimet, me gola, kartonë të verdhë e të kuq, penallti, përmbysje, flakadanë, kapacitet i plotë impianti etj. Me pak fjalë një derbi për kornizë në këtë kampionat. Ndeshja e djeshme në “Air Albania Stadium” startoi me 7 minuta vonesë, pasi gjyqtari Juxhin Xhaja e pati të pamundur për ta nisur në orën 19:00 sikurse ishte parashikuar. Shkak u bënë flakadanët dhe tymueset e hedhura nga të dy grupimet e tifozerisë, që krijuan një atmosferë elektrizuese, në fakt shumë të bukur.

Ndeshja

Njëjtë me atmosferën në tribuna, ishte dhe starti i ndeshjes në fushën e lojës, ku minutat e para ishin “zjarr” i vërtetë. Në fillim shënon Partizani, në rastin e parë që krijohet. Topi harkohet në zonë nga goditja e këndit, largohet nga mbrojtja bardheblu por në kufijtë e jashtëm të zonës Kordeiro lëshon një “predhë” parabolike dhe tund rrjetën, duke ngritur peshë mijërat e të kuqve në stadium. por pas dhjetë minutash Tirana do të përmbyste gjithçka, me dy penallti të njëpasnjëshme. Në fillim është Bitri që pengon Torasën, një rast disi i dyshimtë e që i kushtoi me karton të kuq për protesta Bitrit, e ku Batha me saktësi nga pika e 11-metërshit shënon golin e barazimit në 15’. Më pas në aksionin e radhës është Telushi që ndërhyn gabimisht ndaj Kale dhe gjyqtari Xhaja i ndodhur fare pranë aksionit nuk heziton të tregojë me gisht pikën e penalltisë. Sërish protesta nga të kuqtë, por gjyqtari nuk ndryshon mendje. Dhe Batha është sërish i saktë, duke shmangur në goditje Hoxhën dhe Tirana jo vetëm përmbys Partizanin por kalon në avantazh. Trajneri i Partizanit, duke parë situatën e dobët në prapavijë, largon Braun dhe aktivizon Bilalin, ndërsa Tirana në kushte epërsie në rezultat dhe në aspektin numerik në fushë, tenton të ulë ritmin dhe të menaxhojë kontrollin e topit. Edhe pse me 10 vetë në fushën e lojës Partizani ia del të krijojë raste e të vendosë në rrezik portën e Tiranës, duke luajtur si i barabartë e më mirë se bardheblutë. Tirana në minutat e mbetura të pjesës së parë tentoi kundërsulmin dhe pati një rast me Kobinah në fund, por nuk arriti të finalizonte.

Pjesa e dytë

45 minutat e dyta dëshmuan se epërsia numerike të jep avantazh të padiskutuar. Edhe pse Partizani u përpoq në minutat e para të befasonte me sulme të shpejta në krahë dhe në qendër, ishte Tirana që u tregua konkrete në veprime dhe ia doli ta fusë në “xhep” fitoren, sidomos me autogolin e Idrizajt që shënoi në portën e tij në minutën e 63-të. Ishte një gol që i dha praktikisht fund ndeshjes. Në epërsi të thellë Tirana nisi të menaxhojë lojën me kujdes, duke dashur që të mos u japë asnjë shans të kuqve. Në minutat e fundit të ndeshjes protagonist u bë Muçi, i cili realizoi dy gola, për ta çuar rezultatin në 5-1 dhe duke i dhënë një goditje të rëndë “demave”, që marrin një prej disfatave më të rënda në historinë e përplasjeve me Tiranën. Madje kjo konsiderohet si një prej humbjeve më të trishta të të kuqve në gjithë historinë e klubit, një disfatë që mund të sjellë pasoja për lojtarët dhe stafin teknik. Muçi shënoi fillimisht në minutën e 82-të golin e katërt për Tiranën, ndërsa golin e pestë e shënoi në minutën e parë shtesë. Në fund të ndeshjes u ndëshkua me të kuqe edhe mesfushori i Tiranës, Torasa. Kjo fitore e afron skuadrën e Tiranës më afër me titullin, megjithëse Kukësi është shumë pranë dhe do të shfrytëzojë duelin me Teutën për të mbajtur ritmin me 24-herë kampionët. Pas kësaj fitoreje, Tirana shkon në 47 pikë, 5 më shumë se Kukësi i vendit të dytë (verilindorët kanë një ndeshje për të luajtur sot) dhe 9 pikë më shumë se Partizani i vendit të tretë.