Tiranës i ikën titulli nga duart, Partizani merr kreun dhe vë një dorë tek trofeu

Frenimi i Tiranës dje në Rrogozhinë nga Bylisi, në një barazim 2-2, në kuadër të xhiros së 35-të, ka bërë që bardheblutë të humbasin kryesimin e Superiores dhe të largohen nga titulli, ndërsa numri një në renditje ngjitet Partizani, që me fitoren e djeshme në Elbasan ndaj Kastriotit ka rimarrë kreun e klasifikimit dhe praktikisht ka vendosur një dorë tek titulli kampion. Ka qenë një javë vendimtare, pasi disfata e Tiranës nuk ishte e pritshme, për më tepër që kjo ndeshje do të komentohet gjatë për një penallti të dhënë në dëm të bardhebluve, një penallti e dyshimtë e dhënë nga gjyqtari Kridens Meta. Por cilado qoftë ndërgjegjja e arbitrave, ajo që vlen ka rëndësi renditja dhe në këtë moment, një xhiro para fundit, Partizani ka vënë një dorë tek titulli, edhe pse skuadrat kanë pikë të barabarta. Kjo ndodh pasi të kuqtë janë më mirë në duelet direkte.

Kronologjia e javës 35

Tirana neglizhoi përballë Bylisit dhe praktikisht i “fali” titullin kampion Partizanit. Bardheblutë barazuan 2-2 në stadiumin e Rrogozhinës me ekipin ballshiot, ndërsa të kuqtë fituan 1-4 me Kastriotin në “Elbasan Arena”, duke i marrë kreun Tiranës falë avantazhit në ndeshjen e drejtpërdrejtë. Një fund “triller” i këtij kampionati, që do të ketë ende për të “shfaqur” në javën e fundit. Skuadra kampione e Shqipërisë dhe skuadra e dytë që do të presë biletën për në Kategorinë e Parë do të vendosen në javën e fundit të kampionatit. Verdikti i vetëm përfundimtar, që dhanë rezultatet e javës së 35-të, është rënia matematikisht e Kastriotit në të Parën. Në sfidën e zhvilluar në Rrogozhinë, dygolëshi i Hilës nuk mjaftoi për fitoren e bardhebluve, pasi skuadra ballshiote barazoi dy herë, fillimisht me Danladi, më pas me Adilin me 11-m. Sa i përket takimit të “Elbasan Arenas” mes Kastriotit dhe Partizanit, të parët shënuan krutanët me Grecën, por përmbysja erdhi shumë shpejt me golat e Rrapajt e Da Silvës që në pjesën e parë, ndërsa në fraksionin e dytë shënuan edhe Murataj me Sotën. Teuta rrëmbeu vendin e katërt, që i jep mundësi të luajë në Conference League, falë suksesit 1-0 përballë Egnatias (realizloi Lorenco Vila që në minutën e tretë), ndërsa Vllaznia ndau pikët me Laçin, falë barazimit 1-1 në “Loro Boriçi”. Kuqeblutë shënuan të parët me Balajn, por skuadra kurbinase barazoi me Guindo me 11-metërsh në minutën e 79-të (Vllaznia mbeti me 10 lojtarë). Takimi i vetëm i javës së 35-të, që përfundoi me rrjeta të paprekura ishte Kukësi – Erzeni. Në javën e fundit, Partizani, tashmë kryesues, pret Teutën, ndërsa Tirana luan në transfertë me Erzenin.

Ultrasit e Tiranës pushtojnë fushën, tentojnë të rrahin gjyqtarin Meta

Një ngjarje e rëndë dhe shumë e shëmtuar ndodhi në përfundim të sfidës Tirana – Bylis 2-2, e luajtur në Rrogozhinë. Pas vërshëllimë së trefishtë për përfundimin e takimit, stafi dhe lojtarët e Tiranës rrethuan kryesorin Kridens Meta, të cilin e kontestonin për penalltinë e akorduar në favor të Bylisit (shënoi Adili). Më pas, me dhjetëra tifozë të Tiranës, të pranishëm në stadiumin e Rrogozhinës, çanë rrethimin dhe vërshuan drejt qendrës së fushës me qëllimin dhunimin e Metës. I rrethuar nga forcat e rendit, Meta iu shkëput turmës dhe vrapoi drejt dhomave të zhveshjes, por u ndoq këmba-këmbës nga disa ultras të Tiranës.