Trajneri/ Shehi zbulon të rinjtë e Tiranës që i kanë fituar besimin

Tirana barazoi me rezultatin 2-2 ndaj Kastriotit por falë fitores së parë (4-1) kaloi në gjysmëfinale. Në lidhje me duelin e sotëm dhe me ndryshimet e shumta në organikë, foli trajneri Orges Shehi, që menjëherë pas ndeshjes u shpreh optimist për të rinjtë. “Ne vinim sot mbas një ndeshje të parë me rezultat të mirë. Kjo na jepte mundësinë ta fillonim me ndryshime në formacion, për mos ti dhënë pa pushim minuta, për të qenë të gatshme për të shtunën. Kur shkoi rezultati 2-0 hodhëm 4 lojtarë nga akademia. Iu duhen akoma punë, janë djem të rinj. Janë lojtarë që premtojnë. Abazajn e futëm për të marrë minuta loje, për shkak se mungon prej 2 muajsh”, theksoi Shehi. Më pas foli për ardhjen e Isenit dhe ndryshimet në grup, ku shpreson që të rinjtë të dinë të përshtaten. “Mbas ikjes së Gecit në atë pozicion kemi mbetur vetëm me Përgjonin. Nuk patëm mundësi të gjenim lojtarë. Edhe nga akademia nuk kishte lojtarë që mund t’i afronim për atë rol. Improvizuam Isenin, është qendërmbrojtës me këmbën e majtë. Po bën mirë, është lojtar që e vlerësoj shumë, përpos anës teknike. Stërvitet gjithmonë me 100 % e vetë. Është lojtar me karakter të mirë sportiv”, nënvizoi Shehi.