Trajneri/ Tite provokon: Do të kërcejmë tani e tutje pas çdo goli

Brazili bën art me lojën e tij dhe po me art i feston golat dhe fitoret, me një lloj vallëzimi të veçantë. “Kërcimi i pëllumbave”, mënyra se si ekipi i Brazilit feston pas golave dhe fitoreve, në të cilën u përfshi edhe trajneri Tite, gjatë ndeshjes Brazil-Kore e Jugut, po bën xhiron e botës. Trajneri i brazilianëve, i shtyrë nga Riçarlison (shpikësi i kërcimit) pas fitores 3-0, u bashkua në festën e ekipit të tij, gjë e cila solli diskutime të shumta më pas, pasi u pa si mosrespektim i kundërshtarit. Duke folur në konferencën për shtyp, në prag të ndeshjes çerekfinale të Kupës së Botës, Katar 2022, Tite theksoi se është në kulturën e Brazilit që golat t’i festosh me kërcim. “Është në kulturën braziliane kur shënon një gol. Nuk është kurrë mungesë respekti. Dhe ne do të vazhdojmë ta bëjmë në mënyrën tonë, sepse nuk po tregojmë mungesë respekti ndaj askujt”, deklaroi ai.