Transferimi/ Çinari nuk zgjedh Partizanin, firmos për Shkëndijën e Tetovës

Merkato po jep efektet e para të saj në radhët e klubeve shqiptare, pasi disa lëvizje afruese janë bërë e shumë të tjera pritet të federohen, por ka dhe largime të rëndësishme që u kanë sjellë klubeve jo pak shqetësime. Kampionati shqiptar është i varur nga lojtarët e huaj, ndërkohë që ka pak vëmendje ndaj lojtarëve që kanë dalë nga akademitë e klubeve tona. Një nga lojtarët që po përpiqet të krijojë një profil më të lartë për veten është sulmuesi shkodran Erald Çinari, i cili nuk ka preferuar të kthehet tek Partizanit, sikurse përflitej gjatë tërë këtyre ditëve, por ka zgjedhur që aventurën e tij ta vazhdojë në Maqedoninë e Veriut me Shkëndijën e Tetovës. Lajmin e ka bërë me dije vetë klubi kuqezi duke konfirmuar transferimin e sulmuesit 26-vjeçar. Për të ishin të interesuara shumë klube nga Superiorja pas përfundimit të kontratës në Turqi me Samsunsporin, mes tyre dhe ish-klubi i tij, Partizani. Gjithsesi, duket se klub i shqiptar i Maqedonisë së Veriut ka arritur të mposhtë konkurrencën me klubet e Superiores dhe ka siguruar shërbimet e Çinarit. Lojtari ka cilësi dhe eksperiencë, kështu që mund të ndihmojë mjaftueshëm për të rritur objektivat e Shkëndijës.