Uotfordi në Premier League shkarkon Ranierin, pritet emërimi i Roi Hoxhsonit

Klubi anglez nuk po kalon momente të mira dhe drejtuesit bëjnë ndryshime në pankinë, me shpresën se Hoxhson do ta nxjerrë nga kriza

Në këtë merkato dimri ka ndryshime jo vetëm me emra lojtarësh,. Por edhe trajnerësh dhe dje ndodhi një ndryshim i tillë pikërisht në gjirin e Premier League angleze. Kështu, Klaudio Ranieri është shkarkuar nga Uotfordi pasi vetëm tre muaj drejtimi të skuadrës së Premier Ligës. Ranieri kishte kontratë dy vjeçare kur ishte emëruar menaxher i Uotfordit në tetor, të cilët ishin në vendin e 15 në tabelë në atë kohë. Mirëpo, Uotford ka fituar vetëm dy nga 14 ndeshjet që i ka drejtuar trajneri italian. Ata janë në vendin e parafundit në Premier Ligë dhe janë eliminuar nga FA Cup në rrethin e tretë nga Leicester me rezultat 4-1. “Uotfordi konfirmon shkarkimin e trajnerit Klaudio Ranieri”, thuhet në deklaratën e klubit të bërë në ueb-faqe. “Bordi i Hornets njeh vlerat e Klaudios si një njeri me integritet, i cili gjithmonë do të jetë i respektuar në Vicarage Road, për përpjekjet e tij që skuadra të luajë me dinjitet. Megjithatë, bordi beson që, me afër gjysmën e sezonit të mbetur në Premier Ligë, ndërrimi i trajnerit tani me një trajner të ri për të punuar me një skuadër të talentuar është i nevojshëm me synimin tonë që të mbesim në Premier Ligë”, shkruhet në njoftimin e klubit të njohur anglez. Hornert, janë nën një ecuri prej nëntë ndeshjesh pa fitore që prej se fituan 4-1 kundër Mançester Junajtid në nëntor, tani do të kërkojnë një trajner të ri për pjesën tjetër të sezonit. Ata do të luajnë më 5 shkurt kundër Bërnlit që janë në fund të tabelës. Skuadra nga “Vicarage Road” ka dy pikë më pak se kundërshtari i tyre i radhës. Ndërkohë, lajme të reja vijojnë të vijnë nga kampi i Uotfordit dhe bëhet fjalë për emrin e trajnerit të ri që qarkullon në media dhe që shihet si opsion real për të marrë drejtimin e kërsaj skuadre. Në fakt është emër i ri por jo trajner i ri. Përkundrazi, flitet për njjë teknik veteran, por me shumë eksperiencë, pasi më herët ai ka drejtuar edhe përfaqësuesen e Anglisë. Kështu, ish-përzgjedhësi i Anglisë, Roi Hoxhson pritet ta marrë drejtimin e skuadrës së Uotfordit, ka raportuar “Sky Sports” të martën. Bëhet e ditur se marrëveshja është arritur dhe Hoxhson pritet të prezantohet gjatë ditës. 74-vjeçari do të firmos kontratë me Uotfordin deri në fund të këtij edicioni, me mundësi vazhdimi kurse në këtë post do ta zëvendësojë Klaudio Ranierin e shkarkuar. Hoxhson ka qenë i papunë prej vitit të shkuar kur u largua nga skuadra e Kristal Palacet. Ndërkohë, Uotfordi zë vendin e parafundit në Premier League dhe po lufton për mbijetesë.