Uzuni në top-formë, por Silvinjo do edhe të tjerët të bëjnë kthesën e madhe në Euro-2024

Lojtarët e Kombëtares së Shqipërisë po luajnë minutat e fundit të sezonit aktual, pas të cilit do të bëjnë planet e tyre për vazhdimësinë, por fillimisht duke u përgatitur për dy ndeshjet e qershorit në kuadër të eliminatoreve të Kampionatit Europian “Gjermani-2024”, ku përplasen me Moldavinë fillimisht, e më pas me Ishujt Faroe. Kuqezinjve u del për detyrë të fitojnë gjashtë pikë nga këto përballje, në të kundërt komprometojnë rëndë objektivat e sezonit, ndërkohë që trajneri Silvinjo e ka shpallur listën e lojtarëve dhe pret që ata të bëjnë maksimumin në fushë në të dy ndeshjet e radhës. Duhet thënë se lojtari më në formë i momentit është Myrto Uzuni, kryegoleador i ligës së dytë spanjolle, por lajme të mira vijnë dhe për sulmuesin tjetër kuqezi, Ernest Muçi, një lojtar që po rritet tek Legia e Varshavës.

Myrto Uzuni është “mbret” tek Granada

Granada siguroi rikthimin në elitën spanjolle duke fituar kampionatin në Segunda Division. Një nga liderët e skuadrës ishte padyshim sulmuesi i Shqipërisë, Myrto Uzuni , një lojtar me kontribut që mori përdore skuadrën në rrugën drejt suksesit. Beratasi shënoi plot 23 gola nga 55 në total që shënoi Granada, shifra që faktojnë fare mirë varësinë e ekipit në drejtim të futbollistit shqiptar. Falë 23 golave të realizuar, Uzuni e mbylli kampionatin në La Liga 2 edhe si golashënuesi më i mirë i saj teksa tashmë përgatitet për të shkëlqyer në elitë. Madje, mediat prestigjioze të Spanjës kanë nisur ta kenë në vëmendje teksa është e përditshmja AS e cila i ka kushtuar një speciale Granadës dhe organikës së saj. Kur vjen puna te Uzuni, spanjollët e cilësojnë sulmuesin si një “Killer” që ka realizuar edhe më shumë se emra prestigjiozë të La Liga-s si Karim Benzema apo Antuan Griezman dhe është aktualisht në të njëjtën kuotë golash me Robert Levandovskin e Barcelonës. “Një “Killer” i vërtetë, golashënuesi më i mirë i skuadrës. E bën këtë vetë në vitin e tij të dytë në skuadër, pa lënë mënjan faktin se është asistuesi i dytë më i mirë i Granadës”, shkruan gazeta e njohur spanjolle, “AS”.

Ernest Muçi në planet afatgjata të Legias së Varshavës

Te Legia e Varshavës po bëjnë bilancin e një sezoni të përfunduar si nënkampionë, teksa sytë janë për ndërtimin e skuadrës së sezonit të ri, ku sipas mediave polake Ernest Muçi shihet si pjesë e ekipit edhe për vitin tjetër. Sulmuesi ka zhvilluar një sezon të mirë, duke shënuar gjithsej 6 gola dhe gjithashtu ka dhënë edhe shtatë asiste, mosha e re që ai ka, si dhe cilësitë e tij, japin garanci që Muçi të jetë pjesë e sulmit edhe për sezonin e ri, të paktën nëse në klub nuk vjen një ofertë e mirë. 22-vjeçari mbërriti në Varshavë në shkurt të vitit 2021 dhe ka kontratë deri në 2025-ën me “ushtarakët”. Deri tani, Muçi ka fituar një titulli kampion, ndërsa këtë vit Kupën e Polonisë. Ndërkohë pas përfundimit të sezonit, për të ka mbërritur një ftesë edhe nga ekipi kombëtar. Ernest Muçi është pjesë e listës të trajnerit të Kombëtares Silvinjo për dy ndeshjet e muajit qershor, kundër Moldavisë dhe Ishujve Faroe.