Van Basten “zhvlerëson” Mesin: Tre më të mirët në histori ishin Pele-Maradona-Krujf

Rivaliteti midis Lionel Mesit dhe Kristiano Ronaldos ka qenë ekspozeja e një futbolli për kopertinë gjatë 20 vjetëve të fundit, pasi kjo dyshe, duke rivalizuar me njëri tjetrin për trofetë individualë, kanë eklipsuar futbollistët e tjerë dhe ka bërë që edhe tifozët të ndahen në dysh, në ca të Ronaldos e ca të Mesit. Kanë fituar shumë, jashtëzakonisht shumë, duke thyer rekorde të shumta dhe duke e vijuar betejën e tyre, edhe pse janë në fund të karrierës. Por ka gjasa që historia të mos i klasifikojë ndër më të mëdhenjtë e futbollit botëror. Emra si Pele, Maradona, Zidane, Platini, Krujf, Bekenbauer etj, janë ende të fuqishëm dhe lakohen në histori si ndër më të mirët. A mund të përfshihet Leo Mesi në top-3 më të mirët? Për shumë tifozë aktualë në botë po, por për ikonat e futbollit kjo duket e vështirë. Për këtë rast ka folur edhe ish-sulmuesi i Milanit dhe kombëtares holandeze, Marko Van Basten, i cili edhe vetë është vlerësuar si ndër futbollistët më të mëdhenj në botë. Në fakt, Marko Van Basten është një ndër sulmuesit më të kompletuar dhe të jashtëzakonshëm që ka nxjerrë futbolli. Ish-ylli i Milanit dhe kombëtares holandeze, njihet për deklaratat e tij të drejtpërdrejta. Këtë radhës është ndalur te Lionel Mesi dhe Diego Armando Maradona. Me këtë të fundit është përballuar shumë herë në fundin e viteve ’80 në Serie A, aty ku duelet Milan-Napoli mbeten të paharrueshme. Në një intervistë për “France Football”, legjenda holandeze deklaroi se nuk e përfshin dot “pleshtin” mes 3 lojtarëve më të mirë të historisë së futbollit. “Pele, Maradona dhe Krujf janë për mua tre lojtarët më të mëdhenj në histori. Kur isha fëmija doja të bëhesha si Krujf. Ai ishte miku im, më mungon. Pele dhe Maradona ishin gjithashtu të jashtëzakonshëm. Mesi është gjithashtu një lojtar i mrekullueshëm, por Maradona ka pasur gjithmonë më shumë personalitet në ekip. Mesi nuk është tipi që vendos veten përpara për të shkuar në luftë. Lojtarë të tjerë të mëdhenj? Nuk duhen harruar Kristiano Ronaldo, Platini dhe Zidane”, theksoi Van Basten. Duket qartë se Van Basten nuk e përfshin Mesin në top-3 më të mirët, madje nga mënyra si foli ai nuk e përfshin as në top-5, gjë që tregon se perceptimi për futbollin botëror dhe për më të mirin është shpesh shije personale sesa analizë serioze sportive. Megjithatë, ka emra të tjerë të mëdhenj që mendojnë se Leo Mesi është padyshim lojtari më i madh i futbollit në botë.