Vllaznia hap merkaton verore me afrimin e Grudës, marrëveshje me Antaliasporin për talentet

Vllaznia e mbylli sezonin në Superiore në vend të katërt, pozicioni i fundit që të jep mundësinë e pjesëmarrjes në Ligën e Konferencës. Duhet thënë se në të dy objektivat që kishte për këtë sezon, si për titullin, ashtu dhe për Kupëne Shqipërisë, klubi shkodran dështoi. Por sigurimi i pjesëmarrjes në Europë e justifikon sadopak objektivin e klubit, pasii do të ketë përfitime financiar, shitje biletash e natyrisht promovim lojtarësh të rinj. Në këtë kuadër, klubi pritet të bëjë edhe lëvizje të forta në treg, për të rritur cilësinë e skuadrës, por edhe për të njisur një fazë përgatitore të shëndetshme. Nga ana tjetër, Vllaznia ka lidhur një marrëveshje me klubin e njohur turk, Antaliaspor, ku në fokus do të jenë talentet e reja. Në rrethanat e krijuara, sidomos pas lëvizjeve në stafin teknik, duket se Vllaznia synon të hapë një dritare të re për të ardhmen, ku ambiciet janë për trofe, por edhe që klubi të fitojë shumë para nga shitjet e talenteve që prodhon akademia e klubit. Ndaj dhe lëvizjet e djeshme, ku afron Ildi Grudën në merkato, por edhe marrëveshja me turqit, janë shenjë e një lëvizje të re të Vllaznisë për vazhdimësinë.

Firma me Grudën

Vllaznia ka zyrtarizuar afrimin e parë gjatë merkatos verore. Klubi shkodran ka prezantuar Ildi Grudën, i cili pak ditë më parë e mbylli me Teutën. Sulmuesi ishte pjesë e bregdetarëve prej janarit të vitit 2020. 23-vjeçari fitoi titullin, Kupën dhe Superkupën e Shqipërisë në Durrës. “KF Vllaznia ka kënaqësinë të njoftojnë arritjen e marrëveshjes me futbollistin Ildi Gruda. Sulmuesi shkodran ka firmosur tashmë kontratën dhe do të jetë pjesë e klubit tonë për tre vitet e ardhshme. Ai rikthehet në shtëpinë e tij dhe ne padyshim që i urojmë sa më shumë suksese me fanellën kuq e blu!”, lexohet në komunikatën e kuqebluve. Gruda, i cili ka dalë nga moshat e Vllaznisë, përveç Teutës ka luajtur edhe me Shënkollin. Ndërkohë që provoi edhe një aventurë në Maltë me Valetën.

Marrëveshje me Antaliasporin për talentet

Klubi i Futbollit Vllaznia njofton se ka arritur të nënshkruajë një marrëveshje bashkëpunimi për pesë vitet e ardhshme me Klubin shumësportesh turk, Antaliaspor A.S. Qëllimi i kësaj marrëveshjeje është strukturimi dhe organizimi i Akademisë se Futbollit Vllaznia, duke përcaktuar filozofinë dhe modelin e lojës, organizimin e kurseve të trajnimit për trajnerët e akademisë, zhvillimin e trajnimeve të përbashkëta dhe të fazës përgatitore në mjediset e Antalyaspor A.S, organizimin e turneve dhe ndeshjeve ndërmjet ekipeve të akademisë dhe ekipit të parë. Një komponent shumë i rëndësishëm dhe thelbësor i kësaj marrëveshjeje do të jetë asistenca në përzgjedhjen e lojtarëve për ekipin e pare, me fokus kryesor talentet e reja brenda dhe jashtë vendit, duke krijuar grupe të përbashkëta skautimi për formimin e përbashkët të lojtarëve të KF Vllaznia dhe Antalyaspor AS nëpërmjet huazimeve të ndërsjella, duke synuar transferimin e lojtarëve në liga të tjera me të forta me përfitim të përbashkët për klubet dhe lojtarët që janë pjesë e KF Vllaznia dhe Antaliasport AS.