Zbulohet kalendari i zhvillimeve të finales së 25 majit, 2100 forca sigurie në shërbim të ndeshjes

“Air Albania”, stadiumi ultramodern i Tiranës, do të presë një ndeshje të pazakontë më 25 maj. Bëhet fjalë për finalen e UEFA Conference League, aktivitet që luhet për herë të parë e po për herë të parë vjen në Shqipëri. Për të pasur një ndeshje të madhe dhe një mbrëmje të madhe në tërësi, po mendojnë të gjithë, qoftë FSHF e dikasteret tona qeveritare, por edhe vetë UEFA. Drejtori i Marketingut në FSHF, Gazmend Malo flet për rrugëtimin e gjatë të FSHF-së për të organizuar një event të tillë. “Në Tiranë do të vijnë dy ekipe të mëdha europiane, ka rreth 3 muaj që flitet në mënyrë intensive dhe logo “Tirana 2022” është në mbarë botën, duke iu bërë një PR unik kryeqytetit, me kosto zero. ‘Beteja’ burokratike me dosjet që duheshin dorëzuar ka qenë shumë e gjatë. Edhe FSHF nuk e ka pasur të lehtë. Por duhet falënderuar edhe Presidenti Duka, i cili duke qenë anëtar i Komitetit Ekzekutiv në UEFA ka një peshë fjale që e ka shfrytëzuar”, thotë Malo. Më 24 dhe 25 maj në Tiranë pritet të vijnë deri në 90 mijë tifozë nga Italia dhe Holanda. “Vetë stadiumi që është pika kryesore po bëhen 4-5 ndryshime të mëdha vetëm për ta mundësuar këtë aktivitet. Së pari, është zgjeruar tribuna e medies, pasi vetë eventi kërkon një numër të madh mediesh. Në tribunat e miqve do të reduktohet numri i tifozëve për shkak të studiove televizive për këtë event. Do të shtohen dy ekrane gjigante në stadium si dhe do të krijohen dy shkallë në tribunën kryesore për të zbritur në fushë. Sa i përket aeroportit, është dhënë një garanci e pakushtëzuar për të përballuar fluksin e asaj dite, pasi do të ketë një numër të madh fluturimesh”, vijon Malo.

Mbrëmja gala

Kjo ngjarje e madhe sportive dhe ky event kaq madhështor duhet organizuar në detaje dhe Malo zbulon të gjithë aktivitetet që do të organizohen në kryeqytet, që nga brandimi i qytetit, tek ardhja e trofeut dhe mbrëmja gala që do të zhvillohet te Teatri i Operas dhe Baletit si dhe pikat e takimit të tifozëve “Organizimi i eventit është i detajuar, që nga brandimi dhe zbukurimi i qytetit duke nisur nga aeroporti. Do të ketë darkë gala sa i përket protokollit zyrtar të ndeshjes. Kjo darkë do të zhvillohet në Teatrin e Operas dhe Baletit, në një lloj skenografie të rrallë që nuk është bërë kurrë në Shqipëri. Darka do të zhvillohet në skenë, ku do të jenë drejtuesit më të lartë të UEFA-s dhe Federatës, kryeministri, kryetari i Bashkisë etj. Përveç protokollit që përfshin shkëmbimin e dhuratave, do të ketë edhe një shfaqje të përgatitur për miqtë”, tregon Malo.

Forcat e sigurisë

Mbi 2100 forca sigurie dhe 400 vullnetarë do të angazhohen në finalen e 25 majit. “Ka pasur disa trajnime të forcave të sigurisë që do të jenë brenda perimetrit të stadiumit dhe do të ketë 650 stjuardë minimumi që do të jenë në stadium. Ndërsa jashtë stadiumit do të ketë të paktën 1500 forca policore që do të garantojë rendin në çdo gjë që mund të ndodhë jashtë. Pra mbi 2100 forca që do të garantojnë sigurinë e kësaj finaleje. Gjithashtu, do të ketë të paktën 400 vullnetarë që do të jenë forca ndihmuese në nivel orientimi, suporti të njerëzve që do të jenë për këtë aktivitet”, përfundoi Malo.