Zidane zhgënjen PSG-në, refuzon të drejtojë kampionët e Francës

Paris San Zhermen është një klub i madh, padiskutim, që ka bërë shumë progres vitet e fundit, që ka grumbulluar në gjirin e saj lojtarët më të mirë në qarkullim dhe ka shpenzuar më shumë se çdo klub tjetër në Europë e në botë për të fituar gjithçka. Pra PSG është një klub i parefuzueshëm dhe prej parave që disponon tundohen të gjithë. Me përjashtim të njërit, Zinedin Zidanit, i cili edhe pse shihej favorit për të marrë drejtimin e kampionëve të Francës, duket se është tërhequr, pra nuk ka pranuar. E shkruajnë vetë mediat franceze: “Zinedin Zidane nuk do të ulet në pankinën e PSG-së në sezonin e ardhshëm. Trajneri francez cilësohej si kandidati kryesor për të zëvendësuar argjentinasin Poçetino, i cili ka gjetur akordin për t’u larguar nga kryeqyteti francez”. Por ka zëra që shkojnë përtej një raporti mes Zidanit dhe Paris San Zhermenit. Kështu, “RMC Sport” raporton se “Zizu” ëndërron të marrë drejtimin e kombëtares franceze. Gjithsesi dera nuk është mbyllur dhe nuk përjashtohet fakti që ish-mesfushori i famshëm të bëhet trajner i PSG-së në të ardhmen. Drejtuesit e kampionëve të Francës preferojnë Zidane, madje janë gati t’i japin një liri të plotë duke e kthyer në një stil menaxheri si në Premier League, por ky i fundit ëndërron vetëm “Gjelat”. Ish-kapiteni i dy herë kampionëve të botës, nuk do të paragjykojë në asnjë mënyrë të ardhmen e Didier Deshamps, por në rast se trajneri aktual vendos t’i japë fund me Francën pas Katar 2022, Zidane padyshim që do të ishte kandidat kryesor për ta zëvendësuar. Edhe Noel Le Grat, presidenti i Federatës Francezeve të Futbollit, ka Zidane në krye të listës së dëshirave për pasuesin e Deshamps. 50-vjeçari (i mbush më 23 qershor) fitoi 3 Champions League si trajner i Real Madrid, ndërkohë që qëndron pushim prej një viti. Ndërkohë, Leonardo Parades ka vazhduar kontratën me Paris Saint Germain. “L’Equipe” zbulon se mesfushori ka vazhduar kontratën edhe për një vit me kampionin francez. Kontrata e argjentinasit me klubi francez skadonte në fund të këtij muaji, por janë krerët e klubit që ia kanë vazhduar edhe për një vit kontratën. 27-vjeçari është përfolur se mund të largohet gjatë kësaj vere nga parisienët. Por ishte dëshira e lojtarit që të mbetet pjesë e PSG-së. Parades është pjesë e klubit francez që nga viti 2019, kur u transferua nga Zenit Shën Petersburg. Mbetet të shihet e ardhmja e tij në këtë merkato vere, por surprizat duket se nuk do të mungojnë.