Berisha: Rama refuzoi Begajn në avionin e tij, udhëtimi i tyre drejt OKB-së, ndër më të kushtueshmit

Ish- kryeministri Sali Berisha ka akuzuar dj kreun e shtetit, Bajram Begaj dhe kryeministrin Edi Rama se po zhvillojnë një ndër udhëtimet më të kushtueshme të përfaqësuesve të një shteti. Dje, duke folur në një konference për emdiat për udhëtimin që do të zhvillojnë Rama e Begaj në Nju Jork në kuadër të mbledhjes së OKB, Berisha pretendoi se po shpenzohet gjysmë milionë euro nga buxheti i qytetarëve për këtë udhëtim ndërsa edhe Begajn e akuzon për vjedhje të përditshme.“Mos harroni se udhëtimi për në OKB i Edi Ramës dhe presidentit të vendit, do të jetë njëri nga udhëtimet më të kushtueshme të përfaqësuesve të një shteti. 35 vetë ndodhen në delegacionet e tyre në Nju Jork. Një numër i tillë i madh është më i pazakonti dhe do të thotë, po të keni parasysh se Edi Rama refuzoi të pranojë në Ismailin e tij, delegacionin e kryetarit të shtetit, do të thotë një shpenzim gjer në gjysmë milionë euro nga buxheti i qytetarëve. Po ky është vetëm njëri aspekt. Vjedhjet e tyre janë të përditshme dhe të pafundme. U bëj thirrje qytetarëve të ushtrojnë presionin më të madh ndaj deputetëve, në mënyrë që të votojnë në emër të interesave më jetike të shqiptarëve në nevojë, ligjin për minimumin jetik”, tha Berisha. Në OKB, Shqipëria do të drejtojë dy takime të rëndësishme, takimin për bashkëpunimin për shpërndarjen e shpejtë dhe efektive të ndihmave humanitare kudo në botë në kohë krizash, në situata lufte, apo në situata katastrofash natyrore. Në diskutimin e dytë të rëndësishëm, pritet të marrë pjesë edhe presidenti i Ukrainës Volodimir Zelensky, për shkak se aktiviteti do t’i dedikohet luftës në Ukrainë, ku pjesëmarrësit do të përfshihen në një debat të hapur. Shqipëria e mori për herë të parë Presidencën në Këshillin e Sigurimit të Kombeve të Bashkuara në periudhën 1 qershor – 30 qershor 2022.