Porosia e policit për vrasjen e dy personave, zbardhen detaje tronditëse, ja si ndodhi konflikti në ambientet e burgut

Një megaoperacion i zhvilluar më 4 tetor në Durrës, çoi në pranga 14 persona. Mes të arrestuarve ishte dhe një polic i burgjeve, Flamur Bejko.

Sipas informacioneve, mësohet se ky person i kishte paguar 3500 euro paradhënie vëllezërve Gentian dhe Indrit Beqiraj (të arrestuar) për të vrarë 2 persona që kishte një konflikt të hapur .

Dy personat që do ekzekutoheshin nga Gentian dhe Indrit Beqiraj, janë S.Z dhe I.H.

Zbardhen detaje të reja në lidhje me “porosinë.”

Bejko është konfliktuar në ambientet e burgut me dy personat. Bëhet fjalë për një ngjarje ku efektivi i burgjeve ka qenë i përfshirë në tregtinë e lëndëve narkotike në burg dhe furnizonte njërin prej personave, S.Z.

Polici i kërkonte para dhe në momentin që nuk është paguar është konfliktuar me njërin prej tyre.

Të dy personat e kanë rrahur, i kanë marrë pistoletën dhe ia kanë hedhur në koshin e plehrave.

Për t’i ekzekutuar, vëllezërit Beqiraj dyshohet se do të përdornin 4 kallëpe tritol.

Njoftimi i policisë më 4 tetor 2022

“Gjithashtu, dy vëllezërit janë kontaktuar dhe porositur edhe nga shtetasi F. B., që kundrejt pagesës të kryenin vrasjen e shtetasve S. Z. dhe I. H. Për këtë veprimtari kriminale, vëllezërit kanë marrë një shumë paraprake prej 3500 eurosh dhe kanë siguruar mjetet për realizimin e kësaj ngjarjeje dhe konkretisht 4 kg eksploziv, si dhe një armë zjarri automatik, të cilat janë gjetur dhe sekuestruar gjatë kontrolleve të ushtruara nga shërbimet e Policisë, gjatë datës 3 tetor 2022”, thuhet njoftimin e policisë.