79 vite nga masakra e 4 shkurtit, Muharrem Xhafa: Krim makabër i nazistëve dhe ballistëve, vranë me listë brenda natës 84 vetë për të mbuluar kapitullimin e Gjermanisë para LANÇ, ja roli i tradhtarit dhe kriminelit Xhaferr Deva

Sot shënohen 79 vite nga masakra e 4 shkurtit, ku u vranë 84 persona dhe u burgosën qindra të tjerë nga pushtuesit gjermanë. Kjo masakër është cilësuar si ndër më të rëndat dhe sipas historianëve dhe jo vetëm, ishin ballistët ata që ndihmuan gjermanët në këtë ngjarje. Gazeta “SOT” bisedoi me ish-shefin e Sektorit të Edukimit në Komitetin Qendror të PPSH, Muharrem Xhafa, i cili u shpreh se masakra e 4 shkurtit 1944 është një nga ngjarjet më të përgjakshme në historinë e vendit, duke shtuar se 84 personat u ekzekutuan me udhëheqje të pushtuesit gjerman. Në një reagim për gazetën “SOT”, Xhafa shtoi se kjo masakër kishte si qëllim largimin e popullit shqiptar me zjarr e terror nga rruga e LANÇ. “Sot është përvjetori i masakrës së 4 shkurtit 1944, e cila përbën dhunën më të egër dhe më të përgjakshme të nazistëve dhe kujslingëve shqiptarë kundër popullit të Tiranës. Masakra e 4 shkurtit -synonte të detyronte popullin shqiptar që me dhunë e terror të largohej nga rruga e LANÇ-it dhe të siguronte "qetësinë" e regjimit kujsling.  Për turpin e tyre, masakrën e 4 shkurtit e drejtuan dhe e realizuan kujslingët shqiptarë me Xhaferr Devën e Xhelal Staraveckën në krye, të frymëzuar, të nxitur, të urdhëruar e të drejtuar prej pushtuesve hitleriane. Gjatë natës së 4 shkurtit 1944, nazistë, ballistë e kujslingë të tjerë, të trembur e të tërbuar nga zgjerimi i LANÇ-it, të mbushur me urrejtje kryen në Tiranë, bastisje e raprezalje në shtëpitë e popullit të thjeshtë dhe vranë në mënyrën më barbare brenda natës 84 veta : gra e burra, të rinj e të reja, komunistë e komuniste dhe burgosen mbi 300 vetë të tjerë! Pas përmbysjes së socializmit, mbështetëse e masakrës tragjike të 4 shkurtit është bërë borgjezia me pushtetin e saj, PD-ja dhe Sali Berisha. Për fatkeq, kështu po ndodh edhe tani që në pushtet është PS-ja me aleatet e saj. Masakra e 4 shkurti bën apel për vigjilencë kundër fashizmit”, deklaroi ai.

Sot 79 vjet nga masakra e tmerrshme e 4 shkurtit 1944

Plot 79 vjet më parë, në natën e 4 shkurtit të vitit 1944 pushtuesit nazistë dhe kuislingët nën urdhrat e pushtuesve nazistë vranë 84 persona brenda një nate dhe arrestuan 300 të tjerë në Tiranë. Masakra e 4 shkurtit 1944 në Tiranë është ndër masakrat më të përgjakshme, që kryen nazistët gjermanë dhe bashkëpunëtorët e tyre: si Xhaferr Deva, Ministër i Brendshëm i nazistëve, Kadri Cakrani, komandant i forcave të Ballit Kombëtar, Qazim Mulleti, Prefekti i Tiranës, fashisti Osman Kazazi etj, nën drejtimin e Gestapos gjermane. Natën e 4 shkurtit drejtuesit e xhandarmërisë, me lista në duar e me grupe xhandarësh u futën nëpër shtëpitë e qytetarëve të Tiranës, rrëmbyen djem e burra dhe i pushkatuan nëpër rrugë. Për të futur frikë e tmerr, për të terrorizuar popullin, ata vepruan mbarë, pushkatuan edhe të tjerë që i gjenin në rrugë. I vrisnin dhe i masakronin barbarisht, duke i gjymtuar edhe për së vdekuri, pastaj i hidhnin nëpër kanale, apo dhe në mes të bulevardit. Rrugët e Tiranës u mbushën me gjak. Përmasat e kësaj masakre i pohon të nesërmen Komanda e Xhandarmërisë në raportin e saj ku thuhet: “Forcat e xhandarmërisë, së bashku me forcat e Regjimentit “Kosova” dhe me vullnetarët e Ballit Kombëtar, këtë natë kanë bastisur 230 shtëpi, ku kanë arrestuar 478 persona të dyshimtë dhe nga këta 84 më të rrezikshmit i kanë pushkatuar. Nga të 84 të pushkatuarit rezulton se 67 janë shqiptarë, 9 italianë, 4 malazezë, 2 maqedonas, 1 grek (minoritar) dhe 1 çifut. Viktimat kanë qenë nga Tirana 29 dhe 37 nga rrethet Fier, Korçë, Durrës, Shkodër, Vlorë e Dibër”.

Pse u krye kjo masakër?

Masakra e 4 shkurtit ndaj popullit të Tiranës është një ndër ngjarjet e hidhura të mbetura në kujtesën historike edhe sot, pas 71 vitesh. Sot ka edhe interpretime, të cilat e shikojnë këtë ngjarje vetëm si një hakmarrje personale të ministrit Deva, pas atentatit që ju bë atij. Sigurisht që edhe ky është një motiv – ndonëse makabër! Por, nëse bazohemi në dokumentet gjermane, kjo masakër ishte një vazhdimësi e aksioneve për llogari të gjermanëve dhe qeverisë shqiptare, të drejtuara nga ministri Deva. Këto aksione kishin filluar nga Peja, Prizreni, Shkodra e tash kishin zbritur në Tiranë. Me atentatet e kryera ishte dhënë shkaku për të terrorizuar edhe popullsinë tiranase. “Terror kundër terroristëve, terror kundër anarkistëve, terror kundër nacionalclirimtarëve, terror kundër simpatizantëve të saj”, – ishte motoja e Xhaferr Devës. Përgjithësimi që Deva i bën terrorit, është më shumë se hakmarrje personale. Ajo që e rëndon situatën është përfshirja në këtë aksion edhe e forcave të Ballit Kombëtar dhe heshtja e qeverisë Mitrovica dhe Regjencës. Gjermanët, siç e lexojmë edhe më lart, nuk e konsideronin më në këtë kohë të rëndësishme përfshirjen e përfaqësuesve të Ballit Kombëtar në qeverinë Mitrovica. Përfshirja e Cakranit në këtë masakër mund të ishte edhe një tregues i besnikërisë së tij ndaj gjermanëve, për të bindur Neubacher-in të miratonte përfshirjen e anëtarëve ballistë në kabinetin qeveritar.