Meta sulmon qeverinë: Hapin tender për blerje energjie 3-5 vjet, çmimi i fiksuar 123 euro më i lartë se në bursë

Kryetari i Partisë së Lirisë, Ilir Meta ka akuzuar dje qeverinë për një aferë korruptive në sektorin e energjisë elektrike. Gjatë një konferencën për shtyp nga selia e PL, Meta thotë është hapur një tender për blerjen e energjisë elektrike për një periudhë 3-5 vite. Sipas Metës, por kryhet abuzim pasi në dokumentet e tenderit, çmimi i fiksuar i blerjes është 270 euro për megavat ndërsa në bursë është 147 euro për megavat. Po ashtu, ai ngre pyetjen se çfarë do të ndodhë në periudhën kur Shqipëria do të ketë prurje dhe do arrijë të prodhojë energji. “Bëma më e fundit që po përgatit rilindja përmes KESH është aferë për hapjen e tenderit për blerje energjie 3-5 vjet. Kjo aferë planifikon një vjedhje në një ndër sektorët më të abuzuar nga Rilindja, atë të energjisë elektrike. Shqipëria ka prodhuar gjithmonë energjinë që duhet për konsumatorët shqiptarët. Në 2021 ka prodhuar 5 terramegavat nga 4.5 që janë nevojat e vendit. Aktualisht paguajmë 94 mijë euro në ditë për anijet e Vlorës që duhet të prodhonin 100 megavat. Në dokumentet e tenderit, çmimi i fiksuar i blerjes është 270 euro për megavat ndërsa në bursë është 147 euro për megavat. Diferencat janë kolosale. Është e qartë se babëzia e Rilindjes për të mbyllur tenderin korruptiv të radhës nuk pret. Dihet që KESH ka shitur energji me çmime shumë më të ulëta se në bursë. Me këtë tender korruptiv që gjoja do blejë energji, lind pyetja se çfarë do ndodhë në kohë prurjesh? I bie që KESH do shesë 50 euro megavati dhe prej këtij tenderi do e blejë me 270 euro megavati”, deklaroi ai. Në përfundim, Meta i bën thirrje qytetarëve që të rrëzojnë pushtetin e Edi Ramës në zgjedhjet e 14 majit përmes votës. “Shqipëria përmbush me lehtësi nevojat e saj dhe mund të eksportojë në mënyrë të vazhdueshme energji. Korrupsioni ka penguar shfrytëzimin e gjithë këtyre burimeve. 14 maji është ditë shumë e rëndësishme ku fuqia e bashkimit dhe vota e ndëshkimit do i thotë Rilindjes do i thotë mjaft korrupsionit që po dëmton çdo qytetar të ndershëm”, nënvizoi Meta.