Shteti Shqiptar ka rifilluar në javën e fundit të muajit Mars, pagesat për kompensimi dhe dëmshpërblimin e ish pronarëve, të cilët janë shpallur fitues në vendimet e Gjykatës Europiane për të Drejtat e Njeriut. Lajmi konfirmohet nga të dhënat e datasetit Monitorime Thesari 2015, pjesë e portalit http://spending.data.al. Konkretisht nga data 18 mars deri në datën 4 prill (total 2015-ta) janë ekzekutuar 6 transaksione me vlerë 1 211 638 903 Lekë. Këto pagesa të shtetit shqiptar kundrejt palëve, janë bërë nga Thesari i Shtetit , përmes një banke të nivelit të dytë. Përshkrimi i kategorisë se transaksionit është: Shpenzime për kompensime të tjera të papaguara.
Gjithashtu për secilin transaksion ka edhe një përshkrim të detajuar fature. Çështjet për të cilat është paguar si pasojë e Vendimeve të Gjykatës Europiane janë: Çështja Karagjozi kundër Shqipërisë; Çështja Manushaqe Puto kundër Shqipërisë; Çështja Memishaj kundër Shqipërisë; Çështja Delvina kundër Shqipërisë; Çështja Luli dhe të tjerë kundër Shqipërisë; Çështja Eltari kundër Shqipërisë. Sipas këtyre të dhënave, pagesa e kryer në tre muajt e parë të vitit 2015 për dëmshpërblime sipas Vendimeve të Gjykatës Europiane për të Drejtat e Njeriut, është 1.84 herë më e lartë se të gjitha pagesat për këtë kategori transaksionesh të kryer në muajt e vitit 2014, vit ku shteti shqiptar dëmshpërbleu në vlerën totale 656 076 123 Lekë.
Vendimet e Strasburgut, MF: Ja sa kemi paguar
Vendimet e gjykatës së Strasburgut, kryesisht për problematika pronësie, i kanë kushtuar arkës së shtetit më shumë se 1.2 miliardë lekë në 9 vitet e fundit. E për vitin 2015, detyrimi që duhet shlyer është sa ai i 9 viteve së bashku. Referuar të dhënave të publikuara nga Ministria e Financave, sa i përket procesit të ekzekutimit të vendimeve që kanë të bëjnë me vendimet e Gjykatës Europiane për të Drejtat e Njeriut, deri sot, është ekzekutuar detyrimi financiar, tërësisht, për 38 prej këtyre vendimeve, ndërsa 2 vendime janë në proces miratimi dhe ekzekutimi. Vitet e fundit, numri i pronarëve që i drejtohet Strasburgut ka ardhur gjithnjë e në rritje, ashtu sikurse edhe vendimet për dëmshpërblim që po ashtu janë gjithnjë e më penalizuese për arkën e shtetit. Në këto kushte, Gjykata e Strasburgut i ka lënë një afat qeverisë shqiptare që të gjejë një formulë të re kompensimin e pronarëve, duke ngrirë edhe shpalljen e vendimeve që mund të rëndonin tej mase arkën e shtetit.
Formula e re pritet të publikohet brenda pak javësh, ndërsa në buxhetin e shtetit janë planifikuar fondet përkatëse për vendimet e pritshme të gjykatës. Për të gjitha vendimet e pritshme të Gjykatës, në buxhetin e shtetit të vitit 2015 janë parashikuar 2 miliardë lekë. Ndërkohë, detyrimi i këtij viti, sipas të dhënave të Ministrisë së Financave arrin vlerën e 1.1 miliardë lekëve ose 8.1 milionë euro. Sa i përket ecurisë së disbursimeve të detyrimeve që rrjedhin nga vendimet e Gjykatës së Strasburgut, Ministria e Financave ka sqaruar se shteti shqiptar ka respektuar ekzekutimin e vendimeve të Gjykatës së Strasburgut dhe aktualisht nuk ka vendime të papaguara apo që nuk janë në proces ekzekutimi. Për të gjitha vendimet e Gjykatës Evropiane për të Drejtat e Njeriut, në rast se pagesat e detyrimeve nuk kryhen brenda afatit 3 mujor nga data kur vendimet bëhen përfundimtare, shteti shqiptar ngarkohet me pagesën e kamatë vonesës, për çdo ditë vonesë, çka do të sillte rritje të konsiderueshme të kostos për arkën e shtetit.