Brenda dy vitesh Tirana do të pajiset me një impiant të përpunimit dhe pastrimit të ujrave të zeza që do tu shërbejë mbi 350 mijë banorëve të kryeqytetit dhe komunave përreth. Projekti i vendosur në zonën e Kasharit po bëhet realitet nga kontraktori italo-japonez “Dodi Kubota” falë një kredie të butë të dhënë nga qeveria e Japonisë prej rreth 79 milionë USD. Ministri i Transportit dhe Infrastrukturës, Edmond Haxhinasto inauguroi dje fillimin e punimeve për ndërtimin e impiantit të trajtimit të ujrave të ndotura për Tiranën e Madhe.
Projekti u cilësua nga ministri Haxhinasto si një zhvillim i jashtëzakonshëm për infrastrukturën e Tiranës, por edhe për zonën e Kasharit. Sipas ministrit Haxhinasto, impakti i këtij impianti është shumëplanësh. “Së pari do t’i shërbejë rreth 350 mijë banorëve të Tiranës, duke përpunuar ujërat e përdorura të një pjese të konsiderueshme të saj. Do të ketë një impakt të jashtëzakonshëm në ruajtjen e mjedisit, por edhe mbi zhvillimin ekonomik dhe punësimin e shumë shqiptarëve. Projekti është një zhvillim shumë cilësor për gjithë infrastrukturën e Tiranës në të gjithë komponentët e tij, si në atë të rrjetit të kanalizimeve prej 11 km, në kolektorin kryesor të tij rreth 4.4 km, në kolektori e ri në pjesën jugore të lumit të Lanës, por dhe në vetë impiantin e përpunimit me një kapacitet rreth 95 mijë litra në ditë”, deklaroi Haxhinasto, duke i vlerësuar të gjitha këto zhvillime cilësore për infrastrukturën e Tiranës.
Ai shprehu bindjen se projekti do të përfundojë brenda afatit të përcaktuar dhe bëhet fjalë për një periudhë dy vjeçare për realizimin e tij. Ministri premtoi se projekti do të realizohet jo vetëm brenda afatit por dhe me cilësinë më të lartë nga kontraktori japonez “Kubota Corporation” dhe ai italian “Construzioni Dondi spa”. Ministri i Transporteve falënderoi qeverinë japoneze dhe Agjencinë Japoneze për Bashkëpunim Ndërkombëtar për kurorëzimi e këtij projekti kaq të rëndësishëm të filluar që prej vitit 2005.