Këshilli i Ministrave miratoi në mbledhjen e sotme Aktin Normativ për ndryshimin e buxhetit të vitit 2024. Ministri i Financave, Ervin Mete, u shpreh se nëpërmjet këtij Akti Normativ, qeveria do t’i vijë në ndihmë sektorit fason, me Instrumentin e Garancisë së re Shtetërore prej 4 miliardë lekësh, në mënyrë që ky sektor të përballojë efektet e goditjeve, të përmirësojë proceset teknologjike dhe të rrisë më tej produktivitetin.
Lidhur me këtë kryetari i shoqatës “Pro-Export” Edvin Prençe u shpreh se kemi kërkuar të ndahet në dy forma dhe se ka 700 biznese aktive.
Ai tha se 80% e kolateralit duhet të garantohet nga shteti, ndërsa bëri me dije se me rëndësi mbetet investimi në makineri. Sipas tij me aktivizimin e kësaj pakete do të promovohen bizneset në tregjet e reja dhe brenda vitit do kemi një kthesë të rëndësishme në sektorin tonë.
“Sa i takon shifrës patjetër që e tejkalon pritshmërinë tonë, ne kishim kërkuar një shumë më të ulët, por duhet të ulemi në tavolinë teknike për të diskutuar kushtet që në fund të ditës është një kredi, por në rast e s’do ketë kushte patjetër që do ishte e përgjysmuar dhe jo në efektin e asaj që ne presim. Ajo që ne kemi kërkuar është që të ndahet në dy forma në pjesën e parë të jetë shuma më e lartë për investime në makineri, impiante prodhuese dhe pjesa e dytë është modeli overdraft për të bërë të mundur blerjen e lëndëve të para që janë të rëndësishëm që bëjnë të mundur që ky sektor të bëhet prodhues në cikël të mbyllur.
Duke pasur parasysh se sektori jonë ka 700 biznese aktive kjo garanci sovrane do ketë kushtet e saj dhe duhet të jetë që 80% e kolateralit të garantohet nga shteti dhe përqindja të jetë e ulët. Tjetra që është e rëndësishme të merret parasysh bilanci i vitit 2022 dhe sa i takon kursit të këmbimit tashmë prej disa kohësh ka krijuar një qëndrueshmëri por nuk na jep siguri dhe si e tillë mund të presim rritje, prandaj duhet orientimi drejt ciklit të mbyllur. Shqipëria nuk mund të jetë konkurruese vetëm me krahun e lirë të punës por duhet të ofrojmë shumë gjëra dhe bizneset të bëhen prodhues realë dhe konkretë ‘made in albania’.”
Më tej ai shtoi se në rast se ne nuk kemi më mundësinë duhet të jemi të aftë të rrisim produktivitetin dhe prodhimin dhe kjo bëhet duke rritur investimet në makineritë.
“E përsëris që në fund të ditës këto problematika do jenë të mundur të shkarkohen në produktin final nëse përcaktojmë një kosto fikse dhe kur kemi një produkt të gatshëm ta shkarkojmë. Nga ana tjetër kemi humbur konkurueshmërinë shumë vende të huaja janë larguar por me aktivizimin e kësaj pakete do bëhet e mundur frenimi i largimit dhe do bëhet promovimi për tregjet e reja.
Në momentin që bëhet aktive kjo pakte shpresojmë që brenda muajit tetor-nëntor të shohim një kthesë në këtë sektor. Ka ende shumë punë për të bërë në këtë sektor, kontratat janë shumë negative pothuajse në limitet e zeros, por jemi pozitiv jo vetëm për sektorin por dhe për ekonominë në tërësi.”, përfundoi Prençe.