Prokurorët e SPAK-ut Sotir Kllapi, Arben Kraja dhe Altin Dumani kanë në duar 3 dosjet më të ‘nxehta’ dhe të bujshme në tre dekadat e fundit, dhe rrjedhimisht fatin politik dhe juridik të Ilir Metës, Monika Kryemadhit dhe bashkëpunëtorëve të tyre në aferat korruptive. Dosjen CEZ-DIA, për shkak të presionit të madh politik, e ka marrë vetë në dorë prokurori i hekurt dhe i pakompromis, Altin Dumani, njeriu i besuar i amerikanëve për t’i dhënë fund tranzicionit dhe kulturës së mosndëshkimit në Shqipëri. Nëse vërtetohet se paratë e aferës CEZ-DIA kanë përfunduar tek LSI dhe xhepat e Ilir Metës, ky i fundit pritet të akuzohet për korrupsion dhe pastrim parash. Nga ana tjetër, prokurori Sotir Kllapi ka në duar dosjen e lobimit. Nga Shtetet e Bashkuara të Amerikës dhe nga Qipro ka ardhur përgjigja zyrtare për letërporositë e SPAK-ut, ku konfirmohet se gjatë viteve 2016-2017, Ilir Meta ka shpenzuar qindra mijëra euro për lobim në SHBA, para këto që nuk u dihet burimi dhe që nuk janë deklaruar as në KQZ dhe as në ILDKPKI. Meta mund të akuzohet për pastrim parash dhe falsifikim formularësh. Arben Kraja ka në duar dosjen e shërbimeve estetike. Këto 3 dosje janë bashkuar në një të vetme, pasi si qëndër të hetimit ato kanë pastrimin e parave. SPAK ka futur nën hetim pasuror çiftin Meta-Kryemadhi. Ditën e djeshme ka qenë gazetarja Klodiana Lala, e cila ka zbardhur detaje nga hetimet e SPAK.
Hetimet e SPAK
Sipas saj, Struktura e Posaçme Antikorrupsion po heton në disa drejtime për Metën dhe Kryemadhin. Lala dha detaje për këto hetime, duke njoftuar se SPAK ka sekuestruar një celular të gjetur në shtëpinë e nënës së Monika Kryemadhit. Ekspertët, sipas gazetares, kanë zbërthyer celularin dhe kanë gjetur shumë biseda, që konsiderohen si provë e rëndësishme. “Kohët e fundit SPAK ka sekuestruar një celular në shtëpinë e nënës së zonjës Kryemadhi, i cili është zbërthyer nga ekspertët dhe aty janë zbuluar shumë biseda, të cilat janë duke u parë dhe verifikuar nga hetuesit e BKH dhe prokurorët e çështjes. Ato konsiderohen si një provë shumë e rëndësishme për hetuesit, është duke shkuar në institucione të ndryshme, po pyeten dëshmitarë të ndryshëm për të pasur prova që do t’i shërbejnë kësaj çështjeje. Duhet të kemi parasysh që janë disa dosje në një, për CEZ DIA, një dosje për lobimin në SHBA dhe disa shpenzime spitalore të zonjës Kryemadhi. Të gjitha këto çështje janë mbledhur në një të vetme dhe po hetohet në disa drejtime. Disa prej bashkëpunëtorëve kryesorë të Kryemadhit jo vetëm që u është bërë kontroll në banesat e tyre, por po u merren dhe celularët”, tha Klodiana Lala.
Provat që dyshohet se ka gjetur SPAK
Nga zbardhjet e bisedës në celularë, ka detyruar SPAK që njërës nga bashkëpunëtoreve më të ngushta të zonjës Kryemadhi, t’i shihen të gjitha lëvizjet në sistemin TIMS, për shkak se zonja ka patur udhëtime të shpeshta drejt Britanisë së Madhe. Kjo çështje do të marrë fund së shpejti për shkak të afateve, se kanë kaluar 3 vite nga dosja në prokurori. Aty ka dyshime për korrupsion dhe pastrim parash. Gjithashtu, dyshohet se janë konfirmuar me letërporosi nga Shtetet e Bashkuara të Amerikës se Ilir Meta ka shpenzuar qindra mijëra euro për lobim në vitet 2016-2017, para të cilat nuk u dihet burimi, pasi nuk janë deklaruar as në KQZ dhe as në ILDKPKI. Përgjigje kanë ardhur edhe nga vende të tjera për ndërhyrjet estetike. Mësohet se SPAK ka kryer përgjime dhe ka siguruar materiale të tjera hetimore, ndërsa flitet për dëshmitarë të penduar.
SPAK në sitë gjithë kupolën e ish-LSI
Gjithashtu, SPAK ka futur në sitë të gjithë kupolën e ish-LSI për paratë e pista që akuzohet çifti Meta-Kryemadhi. Gjatë kësaj kohe brenda ambienteve të Prokurorisë së Posaçme ka qenë, Luan Rama, Petrit Vasili, Endrit Braimallari, i cili është pyetur ne cilësinë e ish Sekretarit të Përgjithshëm të Lëvizjes Socialiste për Integrim, Luan Rama por edhe kontabilistë dhe financierë. Në rresht para prokurorëve specialë do të jetë dhe Monika Kryemadhi si politikania që ka firmosur në dosjen lobimit në SHBA për para të pista. Kujtojmë gjithashtu se Ilir Meta deri më tani është thirrur dy herë në SPAK. Madje vetë Monika Kryemadhi konfirmoi se SPAK i ka sekuestruar një celular.