Administrimi venedikas i Shkodrës në shekullin XV dhe çështje të tjera në konferencën “Kultura mesjetare në hapësirat arbërore”

Kultura mesjetare në hapësirat arbërore mblodhi studiuesit në një konferencë shkencore ndërkombëtare. Instituti i Historisë i Akademisë së Shkencave, në bashkëpunim me Institutin e Historisë “Ali Hadri”, Prishtinë zhvilluan konferencën “Kultura mesjetare në hapësirat arbërore” në bibliotekën e universitetit “Luigj Gurakuqi”. Konferenca u zhvillua në dy seanca paralele dhe në të morën pjesë 16 studiues të njohur të periudhës së historisë mesjetare shqiptare. Pjesëmarrësit vinin nga gjashtë institucione të ndryshme, si Instituti i Historisë së Akademisë së Shkencave të Shqipërisë, Instituti i Historisë “Ali Hadri” Kosovë; "Albanisches Institut" në St. Gallen, Zvicër; Departamenti i Historisë së Universitetit “Luigj Gurakuqi”, Shkodër; departamenti i historisë i Universitetit të Tiranës, si dhe nga Universiteti "Eotvos Lorand" (ELTE) Budapest. Çështjet që u trajtuan në konferencë ishin të shumta. Ato prekën një periudhë kohore nga Mesjeta e hershme e deri në Mesjetën e vonë. Tematikat ishin të fushave të ndryshme. Ato kishin të bënim me historinë kishtare të trojeve shqiptare; me hulumtime arkeologjike të kishave dhe qyteteve të ndryshme mesjetare; me çështje të historisë ekonomike; me çështje administrative, sidomos me administrimin venedikas të Shkodrës në shekullin XV, dhe me veprimtarinë politike të grave fisnike në Arbëri gjatë Mesjetës së vonë e me çështje të tjera. Në fund të seancave u bënë edhe diskutime në lidhje me temat e mbajtura. Konferenca shkencore “Kultura mesjetare në hapësirat arbërore" vjen në vijim të veprimtarisë së Institutit të Historisë.