Nga Julia Vrapi
“Amber Alert” një vepër tronditëse, që shënon premierën në Tiranë. Shkruar nga dramaturgu Odise Plaku kjo vepër u kushtohet viktimave të trafikuara për qëllime prostitucioni dhe shfrytëzimit seksual në mbarë botën. Pas Athinës kjo vepër u shfaq edhe për publikun në Tiranë te salla e Universitetit të Arteve me interpretimin e aktores së njohur Georgia Zoi dhe me regji të Giota Koundourakis. Në aktivitetin artistik si dramaturg Odise Plaku është një nga autorët e njohur, që dhe më parë me veprat e tij ka përcjellë mesazhe te publiku. Edhe në Tiranë me këtë vepër, interpretimi i aktores Georgia Zoi solli emocione të forta tek të pranishmit. Aktorja gjatë 70 minutave arrin të përcjellë mesazhet e fuqishme të kësaj vepre kundër plagës sociale të shfrytëzimit të vajzave në moshë fare të mitur për qëllime trafikimi. Në qendër të veprës “Amber Alert” shkruar nga dramaturgu Odise Plaku është një nënë, e cila në një botë makthi ka vite që kërkon vajzën e saj 14-vjeçare e humbur prej kohësh. Në një botë ku tregtia e mishit lulëzon dhe pushteti mbulon krimet masive të korrupsionit dhe epshit kanibalesk, nëna do të flasë, do të denoncojë. Nëse zemra e saj shpërthen, dhimbja do të mbytë të gjithë botën, sepse tani kjo grua e thjeshtë, e shtypur nga një mjedis patriarkal, shndërrohet në një figurë tragjike arketipe, që rebelohet kundër korrupsionit të pushtetit.
Vepra në skena të tjera
Vepra “Amber Alert” e autorit të njohur Odise Plaku e luajtur më parë dhe në teatrin “Viktoria” në Athinë në Greqi në sajë të bashkëpunimit me kompaninë “Dionis Enigma”, shënon bashkëpunimin e parë mes një autori shqiptar dhe artistëve të skenës greke. Në materialin rreth veprës thuhet se me interpretimin e aktores shumëdimensionale Georgia Zoi, me regji të Giota Koudourakis, falë punës së një stafi profesional, vepra solli emocione të fuqishme tek të gjithë ndjekësit e saj përmbi katër muaj, por mori vëmendjen e medias së shkruar, radiofonike dhe televizive dhe të kritikës së artit skenik në Greqi. “Kanë qenë të shumta vlerësimet e kritikës për veprën e shkruar nga autori Odise Plaku, por edhe lojës së aktores shumëdimensionale Georgia Zoi”, thuhet rreth veprës teatrore. Pas suksesit të veprës në Greqi, falë mbështetjes së Bashkisë së Tiranës dhe bashkëpunimit me ambasadën e Greqisë në Shqipëri “Amber Alert” mbërriti edhe në skenën e Tiranës. Dikur me titull “Klithma e një nëne të marrë”, tashmë me emrin e globalizuar “Amber Alert”, vepra është luajtur për herë të parë në skenë e teatrit “Bylis” në qytetin e Fierit nga aktorja e njohur Hajrie Rondo në vitin 2006. Po në vitin 2009 kjo vepër teatrore do të luhet dhe në skenat e Kosovës nga aktorja Teuta Sadiku. Në vijim të krijimtarisë së tij, si autor Odise Plaku nga kritika letrare është cilësuar edhe si një prej zërave të veçantë të poezisë së sotme shqipe.