Atelierët e edukimit për fotoreportazhin në muzeun “Marubi”

Atelierët e edukimit për fotoreportazhin janë një seri punëtorish analitike mbi ekspozitën e Michel Setboun “Fotoreporteri në kohën e duhur, në vendin duhur", ku shfaqen imazhe të Shqipërisë së viteve 1980 deri në vitin 1991, me rrëzimin e sistemit dhe ngjarjet e lidhura me të. Muzeu kombëtar i fotografisë “Marubi” shkruan se nisur nga fotografi e shkrime të gazetave të kohës, nxënësit e shkollave të mesme të ndarë në grupe, punojnë mbi seri fotografike të ekspozitës, duke ndërtuar një fotoreportazh që reflekton kohën e problematikat, e duke nxitur njëkohësisht edhe analizën e ngjarjeve e mendimin kritik. “Për punëtorinë e dytë falenderojmë për bashkëpunimin gjimnazi  "Oso Kuka" - Faqja Zyrtare dhe Departamentin e Gjuhës Frënge të Universitetit të Shkodrës”, shkruan muzeu në faqen e tij, që ka ndarë dhe disa foto nga punëtoritë. Në materialin e muzeut rreth Michel Setboun, thuhej më parë se ishte vetëm 17 vjeç kur filloi udhëtimet e tij nëpër botë. “Në njërin prej tyre tek vizitonte Jugosllavinë, pati rast të ndalonte edhe në Kosovë. Ky ishte momenti që zgjoi tek ai kuriozitetin për të parë Shqipërinë e izoluar. I kamufluar si pjesë e një grupi të rinjsh marksistë francezë që vizitonin Shqipërinë në kuadër të miqësisë mes dy vendeve, Setboun vjen për herë të parë në 1981. Të kësaj vizite janë shkrepjet e serisë “Shqipëria në vitin 1981”, në të cilën nuk gjejmë asnjë imazh që tregon realitetin e burgjeve, kampeve të internimit, shkatërrimin e objekteve të kultit apo skamjen ku jetonin shqiptarët. Jeta në rrugë nën regjimin komunist në Shkodër është e vetmja foto e shkrepur tinëz, në të cilën dallohet habia që shqiptarët kishin kur shikonin të huajt”, shkruan muzeu.  Ekspozita e Michel Setboun në nëntor të vitit që lamë pas kuruar nga Luçjan Bedeni, që u hap në muzeun kombëtar të fotografisë “Marubi” në Shkodër mbështetej nga Ministria e Kulturës dhe Ambasada e Francës në Shqipëri. Ekspozita në muzeun e fotografisë “Marubi” në Shkodër erdhi në vijim të veprimtarive dhe ekspozitave që po zhvillon ky institucion.