Baleti modern kontemporan “Muzg”, që ndërthur natyrshëm lëvizjet trupore me përjetimet emocionale të njeriut premierë në TKOB

“Muzg” titullohet vepra e baletit premierë, që do të vijë në skenën e Teatrit Kombëtar të Operës dhe Baletit. Një vepër me koreografi nga Eno Peçi, e cila rikthen në Tiranë artistin e njohur. A ndodh të humbasim identitetin nëse përjetimet tona veniten në muzgun e jetës? Po nëse emocionet nuk i lejojmë të depërtojnë në brendinë e unit tonë, do ketë më kujtime? Teatri Kombëtar i Operës dhe Baletit shprehet se çel këtë pranverë me “Muzgun”, baletin modern kontemporan, që ndërthur natyrshëm lëvizjet trupore me përjetimet emocionale të njeriut. “Me profesionalizmin e trupës së baletit të Teatrit Kombëtar të Operës dhe Baletit, nën koreografinë e balerinit të mirënjohur ndërkombëtarisht, Eno Peçi, dhe asistencën në koreografi të Eldad Ben Sasson, kjo premierë do të tërheqë pas vetes, nëpërmjet imazheve, të gjithë publikun artdashës. Teatri është shtëpia e të gjithëve, ndaj ju ftojmë përgjatë datave 12-13-14 mars, ora 19.00, në premierën e baletit “Muzgu””, thuhet nga Teatri Kombëtar i Operës dhe Baletit për këtë premierë që pritet të jetë së shpejti në skenë këto mbrëmje të muajit mars për publikun. Skenografia dhe kostumografia e kësaj vepre është me mbështetjen e Harabel Contemporary Art Platform.

 Baleti “Muzg” pas shfaqjes “Exil”

Koreografi i njohur nga Eno Peçi rikthehet në Tiranë me baletin kontemporan “Muzg” pas shfaqjes “Exil” me koreografi të tij në muajin dhjetor të vitit 2022 në TKOB. Në atë kohë koreografi Eno Peçi u shpreh se ishte duke krijuar një pjesë të re për Teatrin Kombëtar të Operës dhe Baletit, që premierën do ta kishte këtë vit në muajin mars. “Është një pjesë me titullin “Muzg”” shprehej ndër të tjera Eno Peçi, një nga artistët e vlerësuar shqiptarë në skenat ndërkombëtare. Baleti “Exil” i realizuar nga Baleti Kombëtar i Kosovës, me koncept dhe koreografi të Eno Peçit pasqyroi problemet sociale të shoqërisë dhe ikjen nga vendi si një prej mundësive për të dalë nga problemet. Premiera e shfaqjes “Exil” u shfaq në vitin 2019 në Teatrin Kombëtar të Kosovë. Eno Peçi njihet si i pari balerin shqiptar, i cili performoi live në Koncertin e Vjenës të fillim vitit 2014. Në vitet 1994-1998 studion në shkollën e baletit në Tiranë. Më 1998-2000 ndjek shkollën shtetërore të baletit në Vjenës. Në vitin 2000 ai u bë anëtar i Teatrit të Operës e Baletit të Vjenës. Ndër pjesët e tij më të rëndësishme numërohen tek “Spartaku” i Renato Zanelas dhe “Impresionet e Çajkovskit” të Ivan Kavalaris, “Mjekërkuqi”, “Liqeni i mjellmave” të Rudolf Nurejevit, “Maçoku me çizme” dhe “Pas de qatre” te “Bukuroshja e fjetur” e Peter Wright, “Kopelia”, “Romeo dhe Zhuljeta”, “Onegini”, “Ashtu siç ju pëlqen”, “Borëbardha”, “Arrëthyesi”, etj.