Komedia brilante “Dasma e hatashme” prodhim i Teatrit Shëtitës “Çajupi” për tre mbrëmje me radhë do të jetë në skenën teatrore të Elbasanit. Një tekst mahnitës, kostume fine, aktorë të mrekullueshëm në këtë shfaqje teatrore. Vepra e autorit Robin Hawdon me regji nga Kiço Londo është mirëpritur nga publiku kudo që është shfaqur deri tani. Por pas kërkesave të shumta në Elbasan, do të jetë sërish në teatrin “Skampa” në datat 21, 22 dhe 23 mars. Regjisori Kiço Londo tregon se komedia është shfaqur së fundmi në qytetet Librazhd, Përrenjas, Korçë dhe Pogradec. “Në të gjitha këto qytete publiku ka tejmbushur sallat dhe një pjesë e tij nuk ka mundur ta shoh shfaqjen për shkak të kërkesave të shumta”, tregon regjisori Londo. Në role e komedisë janë Julian Deda, Fatma Haxhialiu, Ermira Hysaj, Marjana Kondi, Denisa Demaj dhe Engjëll Hoxha. “Dasma e hatashme” një komedi tipike britanike, që përfshin një numër të pafund përplasjesh me shpejtësinë e dritës. Në mëngjesin e dasmës së tij, dhëndri zgjohet në suitën e hotelit me një vajzë të panjohur, e cila rezulton të jetë e dashura e re e shokut të ngushtë. Dhëndri dhe shoku që është dhe kumbari (duke mos ditur kush është vajza) e kalojnë aktin e parë duke u përpjekur të fshehin situatën nga nusja dhe të përdorin shërbyesen e dhomave. Situata bëhet më e ndërlikuar pasi zbulohet identiteti i vajzës dhe i shërbëtores. Shoku i ngushtë, nusja dhe nëna e nuses fillojnë të bashkojnë të gjitha pjesët. Gjithçka funksionon në fund, por jo pa dhimbje.
Arsyet pse kjo vepër në skenë
Teatri Shëtitës “Çajupi” që udhëhiqet nga regjisori Kiço Londo ka sjellë deri tani prodhime të ndryshme teatrore, një sukses me veprat që janë shfaqur për publikun. Në vijim të tyre vjen dhe komedia brilante “Dasma e hatashme”, që këtë mbrëmje dhe dy net të tjera do të jetë në skenën e teatrit “Skampa”. Më herët regjisori Kiço Londo tha se ajo që e ka ngacmuar më shumë për të sjellë këtë komedi brilante në skenë është linja e dashurisë.“Arsyeja e parë pse zgjodha këtë vepër është koherenca, që ka me realitetin shqiptar. Ngjarjet në vepër përshkruhen nga një kaos, nga mungesa e qetësisë, nga zgjedhjet gabim, nga çorientimi psiqik dhe fizik i personazheve dhe vetëm ndërhyrja e fortë e dashurisë bën që situata të kthehet në normalitet. Por ajo që më ka ngacmuar më shumë është linja e dashurisë së veprës. Pra përveçse është një komedi e bukur, e shpejtë, me karaktere të fuqishme, me dialog brilant, vepra ka edhe një linjë të dashurisë romantike”, shprehet regjisori Londo, sipas të cilit se arsyeja e dytë pse e mori këtë vepër ishte dhe përkthimi brilant i Artur Lenës. Në këtë komedi regjisori Kiço Londo ia ka besuar rolet artistëve të njohur, por dhe emrave që sipas tij vinin surprizues për publikun.