Festivali “FemFest” me aktivitete të ndryshme ku trajtohen problematikat sot, përmes artit jepen mesazhe për gratë dhe vajzat

Festivali “FemFest” nis të shtunën edicionin e dytë në Tiranë. Shfaqje të ndryshme teatrore janë pjesë e këtij festivali, ku nuk mungojnë dhe veprimtari të tjera. Pjesë e festivalit do të jenë artiste, aktiviste, shkrimtare, etj, ku në qendër të tij do të jenë problematikat sot. Me drejtore ekzekutive Iliriana Basha edhe këtë vit “FemFest” do të përcjellë mesazhe me rëndësi për shoqërinë tonë.  Ajo tregon se përmes artit mesazhet vijnë më fuqishëm te publiku, ku do të trajtohen problematikat sot. “Gratë artiste, aktiviste të shoqërisë civile mblidhen për t’u bërë bashkë dhe përmes artit të japim mesazhe. Ne e dimë që përmes artit vijnë më shumë, vijnë më fuqishëm te publiku. Sigurisht trajtojmë çdo problematikë që na shqetëson neve si gra, aq më tepër me rastin e  vrasjeve të tre grave. Ne e kuptojmë çdo ditë dhe më shumë se në çfarë shoqërie po jetojmë. Ne të gjitha çështjet që na shqetësojnë mundohemi t’i përcjellim përmes aktiviteteve në kuadër të “FemFest” në Tiranë. “FemFest” vjen me mesazhe për gratë, vajzat dhe barazinë gjinore”, shprehet Iliriana Basha drejtore ekzekutive e festivalit që nis të shtunën në skenën e Teatrit Kombëtar te “ArTurbina” edicionin e tij të dytë. Festivali starton më datë 4 për të vijuar deri në datën 8 mars. Si organizatore dhe drejtore ekzekutive Iliriana Basha ka arritur të zhvillojë në Tiranë një festival, i cili ashtu si dhe një vit më parë do të përcjellë shumë për publikun, përmes shfaqjeve mbresëlënëse, debateve, protestës, muzikës, etj. Për drejtoren Iliriana Basha me rëndësi është që ky festival të vijojë të zgjerohet me pjesëmarrjen. “Këtë vit pjesë e tij janë dhe trupa nga Kosova”, thotë ajo. Në programin e festivalit, drejtoresha Basha thotë se për herë të parë do të zhvillohet dhe “Fem Talk”. “Gjashtë gra vijnë dhe sjellin historitë e tyre me sfida, sakrifica, por që ia kanë dalë gjithmonë duke dhënë një mesazh fuqizimi për gratë dhe vajzat e tjera”, shprehet ajo.

Programi i edicionit të dytë

Festivali “FemFest” hapet më 4 mars me shfaqjen teatrore "Monologjet e vaginës" me regji Altin Basha. Te Teatri Kombëtar “ArTurbina” do të interpretojnë Olta Daku, Eriona Kakeli dhe Nigda Dako. Më 5 mars paradite panel diskutimi organizuar nga Rrjeti i Fuqizimit te Grave (AWEN) dhe Rrjeti i Grave të Kosovës (KWN)- Destil Creative Hub, Tiranë. Në mbrëmje ora 19:00 vjen shfaqja teatrore “Stiffler” regjia Kushtrim Koliqi te Teatri Kombëtar Eksperimental, “ArTurbina”. Më pas në orën 20:00 shfaqja teatrore "Tërësisht të huaj" me regji Erion Isai, Teatri Kombëtar. Në datën 6 mars ora 11:30 zhvillohet panel diskutimi: Seksizmi në politikë, tek Destil Creative Hub. Nata e tretë e festivalit ia lë radhën një tjetër shfaqje. Në orën19:00 do të shfaqet "Seks, faleminderit, sa për ta provuar" regji Merita Smaja- Teatri Kombëtar. Po në orën 20:00 vjen shfaqja teatrore "Çifti" me regji nga Altin Basha, që do të jetë te Teatri Kombëtar, “ArTurbina”. Më datë 7 mars paradite promovimi i lirit “Dramaturget e reja” te Teatri Kombëtar, pasdite ora 17:00 ekspozita “Artistet që na mungojnë”. Në ora 19:00 shfaqja “Certifikata e martesës” me regji nga Driada Dervishi tek Teatri Kombëtar. Në ditën e fundit, që është më 8 mars-Dita e Grave në ora 10:00- inaugurimi i instalacionit "Këpucët e Kuqe", protestë dhe performancë në sheshin kryesor. Ora 11:00 performancë grupi “Haveit”, në orën 19:00 ndarja e bursave dhe shfaqja teatrore "Gratë" regjia Nastazja Domaradzka tek Teatri Kombëtar, “ArTurbina”.