Interpretime nga krijimtaria poetike, por edhe diskutime mbi çështje të poezisë dhe artit të letërsisë në festivalin “Pasqyra e Narcizit”. Festivali i organizuar nga Qendra Kombëtare e Librit dhe Leximit u zhvillua në mjediset e Torrës Veneciane në Durrës. Dy net të poezisë, që bënë së bashku poetët e rinj të qytetit të Durrësit, por edhe të qyteteve të tjera. Ky festival i konceptuar nga Qendra Kombëtare e Librit dhe Leximit sipas drejtoreshës Alda Bardhyli erdhi dhe si një mënyrë për të afruar sa më shumë brezin e ri me leximin dhe poezinë në veçanti. “Qëllimi i këtij festivali është të afrojë më pranë lexuesit poetin dhe poezinë, të nxitë leximin dhe shkrimin e poezisë si një nga format më elokuente të artit të shkruar, njëkohësisht të kthejë vëmendjen e të rinjve kah historia dhe kultura shqiptare”, u shpreh drejtoresha e Qendrës Kombëtare të Librit dhe Leximit, Alda Bardhyli. Festivali nisi më 22 maj në Torrën Veneciane në Durrës. Nata e parë kushtuar poezisë bëri bashkë poetët e prozatorët Alban Tufa, Tobias Xhaxhiu, Bujar Hoxha dhe Pol Milo, duke ofruar interpretime nga krijimtaria e tyre poetike, por edhe diskutime mbi çështje të poezisë dhe artit të letërsisë. Tematika e natës së parë kushtuar poezisë ishte “Erosi dhe poezia”. Si e gjen rrugën Erosi kah poezia? A është poezia areali që i tjetërson fytyrën dashurisë? Si janë raportet mes Erosit dhe poezisë? Si ka ndryshuar materiali poetik prej zanafillës poetike deri në ditët e sotme? Cilat janë temat që poetët e rinj kanë interes për të elaboruar në vargjet e tyre? Këto ishin disa nga pyetjet që poetët e rinj ndanë me të pranishmit.
Festivali në natën e dytë
Festivali i poezisë për të rinj “Pasqyrat e Narcizit” vijoi dhe në natën e dytë me të tjerë poetë të rinj në hapësirat e Torrës Veneciane në Durrës. Si shfaqet figura e femrës në poezi? Çfarë atributesh të reja kanë vendosur poetët t’i veshin asaj? Si është femra shqiptare në vargje dhe rreshta prozaik? A ka një ngjashmëri mes femrës në letërsi dhe asaj në përditshmëri? Cila është e bukura femërore në ditët e sotme në vargjet poetike? Pyetje e çështje të tilla që lidhen me poezinë shqipe u diskutuan nga panelistët Olimbi Velaj, Nurie Emrullai, Majlinda Rama, Liza Brozi dhe Ersid Karaj. Festivali i poezisë “Pasqyrat e Narcizit” vjen në vijim dhe të tjera aktiviteteve që ka zhvilluar më parë Qendra Kombëtare e Librit dhe Leximit me në fokus krijimtarinë dhe autorët tanë. Një vit më parë QKLL zhvilloi një tjetër festival në Durrës, ku autorë, studiues dhe më gjerë u mblodhën për letërsinë në festivalin “Varg”. Një festival, që nisi në sezonin veror në Torrën Veneciane në Durrës, ku nata e parë e festivalit bashkoi simbolikisht Shqipërinë dhe Kosovën në një skenë letrare. Misioni i Qendrës Kombëtare të Librit dhe Leximit është ndjekja dhe zbatimi i projekteve në fushën e librit, duke synuar përhapjen e kulturës së leximit në të gjithë vendin dhe nxitjen e krijimtarisë.