Kalaja e Bashtovës, ende e pazbuluar tërësisht, po i nënshtrohet restaurimit dhe rijetësimit

Kalaja e Bashtovës është një nga më të bukurat në Shqipëri dhe tashmë ka hyrë në programin e restaurimit, si pjesë e programit “EU4Culture”. Ministrja e Kulturës Elva Margariti shprehet se kjo kala meriton të jetë një ndër destinacionet më të vizituara. “Kalaja e Bashtovës, ende e pazbuluar tërësisht po i nënshtrohet restaurimit dhe rijetësimit falë programit EU4Culture, financuar nga European Union in Albania dhe zbatuar nga UNOPS Albania . Kjo kala meriton të jetë një nga destinacionet më të vizituara të kulturës”, thuhet nga ministrja e Kulturës në Facebook. E ngritur pranë fshatit të Vilë-Bashtovës në një distancë prej 3-4 km, në veri të grykëderdhjes së lumit të Shkumbinit, kalaja haset për herë të parë në një hartë detare të vitit 1521. Kështjella është ndërtuar në shekullin XV dhe u ka shërbyer venecianëve për shkëmbime tregtare. Zona e Bashtovës është përmendur si një port lumor në Shkumbin si dhe një qendër e eksportit të drithërave. Kalaja ka trajtë katërkëndore me përmasa 60×90 metra. Pjesa perëndimore e saj është rindërtuar në shekullin XVIII. Muret e saj kanë një lartësi prej 9 metrash. Mendohet se kjo kala ka qenë dykatëshe, ku një kat i saj është i fundosur nën sipërfaqen e tokës. Ajo që e bën Bashtovën të veçantë në krahasim me kështjellat e tjera, që mund të vizitohen në Shqipëri është fakti se ajo është e vetmja kështjellë e ndërtuar në një fushë dhe jo në majë të kodrave apo maleve. Projekti “BE për Kulturën” është një nga projektet më të mëdha të trashëgimisë kulturore, i cili financohet nga Bashkimi Evropian (BE), me një buxhet të përgjithshëm prej 40 milionë euro dhe zbatohet nga UNOPS në partneritet të ngushtë me Ministrinë e Kulturës. Ky projekt shtrihet në të gjithë territorin e prekur nga tërmeti i 26 nëntorit, 2019. Krahas restaurimit, projekti do të investojë në rigjallërimin e siteve të përzgjedhura të trashëgimisë kulturore, duke përfshirë përmirësimin e shërbimeve dhe të kushteve të sitit.