Problemet në albanologji, akademikë e profesorë mblidhen në Shkodër

Problemet e albanologjisë u trajtuan në konferencën shkencore në Shkodër. Akademikë e profesorë, studiues e studentë ishin të pranishëm në konferencën “Probleme të reja të albanologjisë në kohën e sotme”, që u zhvillua në Universitetin e Shkodrës “Luigj Gurakuqi” në bashkëpunim me Akademinë e Shkencave. Në këtë konferencë ishin të pranishëm rektorja e USH prof. dr. Suzana Golemi, kryetari i ASHSH akad. Skënder Gjinushi,  z. Benet Beci kryetar i bashkisë së qytetit të Shkodrës, prof. dr. Artan Haxhi, prof. dr. Anila Omari, akad. Genc Sulçebe, prof. dr. Neritan Ceka, akad. Shaban Sinani, prof. asoc. dr. Evalda Paci, prof.dr. Aleksandër Rusakov, prof.dr. Tomor Plangarica, etj. Kjo konferencë shkencore që sot zhvillon ditën e dytë koordinohet nga dr.Zamira Shkreli dhe akad. asoc. Gëzim Hoxha.  Kryetari i Akademisë së Shkencave  akad. Skënder Gjinushi në fjalën e tij u përqendrua te rëndësia që ka albanologjia për të bashkuar institucionet në veprimtari shkencore të kësaj natyre. Më tej ai theksoi se në vijim të kësaj tradite, një muaj më parë dega e albanologjisë në Mynih organizoi një tjetër konferencë albanologjike ndërkombëtare kushtuar zhvillimeve të shqipes në rrugëtimin e saj historik e gjuhësor; që ndriçoi çështje specifike të studimeve shqiptare të kësaj fushe. “Konferenca jonë e tanishme i ka caktuar vetes si detyrë të përqendrohet në aktualitetet e albanologjisë, që, duke qenë gjithnjë në zhvillim e sipër e në larmi, janë e do të jenë përherë objekt studimi përparësor”, tha akad. Gjinushi.  Çështje të reja në albanologji ka për shumë arsye. Zbatimi i teknologjive të reja është një prej tyre. Numerizimi, gjuhësia digjitale, informatizimi global, përbëjnë vetëm faktorin teknik të këtyre zhvillimeve. Në vijim kryetari i ASH Gjinushi theksoi se ligji i ri për shkencën do të normalizojë vetë sistemin. Në konferencë marrin pjesë 36 studiues të albanologjisë nga Universiteti i Shkodrës “Luigj Gurakuqi”, Akademia e Shkencave, Institutet e Historisë dhe Letërsisë, si dhe katedra të tjera universitare në Shqipëri.