Hapësira e njohur si ish-Aneksi i Bibliotekës Kombëtare, sot qendra “Sotir Kolea” iu rikthye publikut përmes shërbimit të librave të rrallë, por pranë laboratorit po vijon dhe puna me restaurimin. Laboratori i restaurimit të librave në qendrën e librit “Sotir Kolea”, ka restauruar rreth 600 libra të viteve 1800-1940, pjesë e arkivit të Bibliotekës Kombëtare të Shqipërisë. Ministri i Ekonomisë, Kulturës dhe Inovacionit Blendi Gonxhja ka ndarë një video në rrjet sociale ku tregohet puna që po bëhet me restaurimin dhe se këto pajisje të mundësuara falë mbështetjes së Bashkimit Evropian, ruajnë fondin e çmuar të librave dhe vlerave të rralla që ato mbartin. Antonio Çikollari, përgjegjës i sektorit të mirëmbajtjes së librit pranë qendrës “Sotir Kolea” shpjegon se dikur punët kryheshin në mënyrë mekanike. “Punonjëset i bënin me dorë ose me mjete pothuaj primitive. Ndërsa me pajisjet e reja, puna lehtësohet shumë, bëhet shumë më e lehtë për punonjëset e bibliotekës, por ndikon edhe në sasinë e restaurimit dhe përpunimit të librave”, shprehet ai. Puna që bëhet për restaurimin e librave merr një rëndësi për këto koleksione të rralla që janë pjesë e arkivit të Bibliotekës Kombëtare, por përpara restaurimit bëhet dhe një përzgjedhje. Antonio Çikollari përgjegjësi i sektorit të mirëmbajtjes së librit pranë kësaj qendre thotë se vlera të fshehura po shpalosen për publikun. “Përzgjedhja e librave bëhet edhe në varësi të përmbajtjeve. Për shembull, kemi libra të Erasmusit të Roterdamit të cilët janë gjetur në ambientet e Bibliotekës Kombëtare dhe që normalisht libri dëmtohet për efekt kohe, edhe kur nuk është ekspozuar kurrë. Kështu që lind nevoja që këtyre veprave të rralla që kemi, t’u kushtohet një vëmendje e veçantë, në mënyrë që këto vlera të “fshehura” në arkiva t’u japim dritë e t’i shpalosim për publikun”, shprehet Çikollari.
Projekti më parë
Qendra “Sotir Kolea” mban emrin e një personaliteti të kulturës shqiptare, i cili si drejtues i Bibliotekës Kombëtare të Shqipërisë gjatë periudhës 1928-1937, dha një kontribut të veçantë në hedhjen e bazave të bibliotekonomisë në Shqipëri. Kjo qendër u rikonstruktua dhe u kthye në jetë përmes investimit të qeverisë dhe pajisjes me aparatura moderne me mbështetjen e Bashkimit Europian përmes programit “EU4Culture”. Më herët projekti në tërësi konsistoi në rikonstruksionin total të objektit, në krijimin e kushteve dhe hapësirave të përshtatshme të punës për stafin dhe përdoruesin e rregullt. Më parë u bë me dije se programi “EU4Culture” i financuar nga Bashkimi Evropian, zbatuar nga UNOPS Albania në partneritet me Ministrinë e Kulturës ka prokuruar dhe dorëzuar pajisje moderne restauruese me vlerë 667,174.00 USD (afërsisht 621,672.73 Euro) për Njësinë e Restaurimit të Fondit të Bibliotekës Kombëtare Shqiptare.